Gjykata e Përgjithshme e Bashkimit Europian ka rrëzuar kundërshtimin e miliarderit rus Roman Abramovich ndaj sanksioneve të vendosura ndaj tij pas pushtimit rus të Ukrainës, duke lënë në fuqi ngrirjen e aseteve dhe kufizimet e udhëtimit.
Gjykata vendosi të mërkurën se Këshilli i Bashkimit Europian kishte vepruar brenda kompetencave të tij kur zgjati masat kufizuese ndaj ish-pronarit të klubit anglez Chelsea, fillimisht deri në shtator 2025 dhe më pas deri në mars 2026.
Abramovich, i cili ka shtetësi ruse, izraelite dhe portugeze, është aksioneri kryesor i Evraz, një prej grupeve më të mëdha ruse në sektorin e çelikut dhe minierave. Ai zotëron gjithashtu aksione në Norilsk Nickel, një prodhues i rëndësishëm i paladiumit dhe nikelit të rafinuar.
Sipas Gjykatës, kriteret e përdorura nga BE-ja për vendosjen e sanksioneve janë objektive, mjaftueshëm të sakta dhe proporcionale. Masat synojnë biznesmenë të rëndësishëm që operojnë në Rusi, veçanërisht persona aktivë në sektorë që gjenerojnë të ardhura të konsiderueshme për qeverinë ruse.
Gjykatësit hodhën poshtë argumentin e Abramovich se ai ishte shënjestruar për shkak të profilit të tij të lartë publik.
Sipas vendimit, masat ndaj tij u vendosën për shkak të zotërimeve të tij të kapitalit dhe jo, siç pretendonte Abramovich, për shkak të një synimi të BE-së për të shfrytëzuar famën e tij publike.
Gjykata rrëzoi gjithashtu pretendimin se masat kufizuese ishin vendosur në praktikë nga grupet e punës të Këshillit dhe jo drejtpërdrejt nga qeveritë e vendeve anëtare.
Sipas gjyqtarëve, edhe nëse grupet e punës kanë kryer punën përgatitore, vendimi përfundimtar është marrë nga Këshilli i BE-së.
Për rrjedhojë, Gjykata vlerësoi se kufizimet ndaj Abramovich janë në përputhje me të drejtën e Bashkimit Europian dhe Kartën e të Drejtave Themelore të BE-së, si dhe proporcionale me objektivin për të mbështetur një zgjidhje paqësore të luftës në Ukrainë.
Abramovich ka mundësinë ta apelojë vendimin në Gjykatën e Drejtësisë të Bashkimit Europian brenda dy muajve e dhjetë ditëve nga njoftimi i tij.
Miliarderi rus është gjithashtu nën sanksione në Britaninë e Madhe, ku vazhdon debati për rreth 2.5 miliardë paund të siguruara nga shitja e Chelsea Football Club.
Paratë ndodhen të ngrira në një llogari bankare që prej vitit 2022, kur autoritetet britanike vendosën sanksione ndaj Abramovich për lidhjet e tij të pretenduara me Presidentin rus Vladimir Putin. Qeveria britanike ka kërkuar që fondet e siguruara nga shitja e klubit të përdoren sipas kushteve të përcaktuara për to, ndërsa çështja vazhdon të mbetet e pazgjidhur.
