Kryeministri Edi Rama e ka cilësuar drejtimin e Bashkisë së Tiranës pa kryetarin e saj si një “eksperiment social, ligjor, politik dhe ekonomik” të dështuar.
Sipas tij, arrestimi i kryebashkiakut dhe drejtimi i institucionit nga burgu kanë shkaktuar vonesa në përfundimin e procesit të rindërtimit pas tërmetit, veçanërisht në zonat e Kombinatit dhe “5 Maji”.
“Do të finalizojmë shumë shpejt planin për t’i dhënë fund historisë së pajustifikueshme të zvarritjes së rindërtimit, nga Kombinati deri te ‘5 Maji’”, deklaroi Rama.
Kreu i qeverisë u shpreh se familjet që vazhdojnë të presin marrjen e banesave të reja janë ndër më të prekurat nga situata e krijuar në Bashkinë e Tiranës.
“Që kur Bashkisë së Tiranës iu pre koka, për arsyet që dihen dhe për mosarsyet që nuk dihen, viktimat e para dhe më të pafajshme të kësaj kohe të humbur janë familjet që presin t’u jepet çelësi, pasi janë viktima të tërmetit”, tha ai.
Rama e cilësoi situatën të paprecedentë për një vend evropian, duke iu referuar edhe praktikës së Gjykatës Evropiane për të Drejtat e Njeriut në Strasburg.
“Heqja e kokës së kryeqytetit dhe eksperimenti i drejtimit të tij pa kokë kanë sjellë shumë viktima dhe dëme kolosale. Është një eksperiment social i rëndë dhe totalisht i dështuar”, përfundoi kryeministri.
