Autoritetet franceze kanë vendosur kufizime të lëvizjes gjatë natës në disa zona të Parisit dhe qytete të tjera, pas protestave të fundjavës që u shoqëruan me përplasje, zjarrvënie dhe plaçkitje.
Në kryeqytet, shtetrrethimi do të zbatohet nga ora 23:00 deri në 06:00, sipas orës lokale, në Place de la République dhe zonën tregtare Les Halles. Në pjesë të tjera të qendrës janë ndaluar tubimet pa autorizim.
Masa të pjesshme, që kufizojnë lëvizjen e të rinjve dhe grumbullimet, janë njoftuar edhe në Marsejë, Bordo, Nicë, Lion, Lilë dhe qytete të tjera.
Sipas zyrtarëve, më shumë se 2.500 persona janë arrestuar, ndërsa rreth 1.000 efektivë policie janë plagosur. Agjencia AFP raportoi gjithashtu se një protestues kishte humbur dorën nga shpërthimi i një granate policore për kontrollin e turmave.
Lecornu nuk përjashton gjendjen e jashtëzakonshme
Pas një mbledhjeje urgjente të hënën, kryeministri Sébastien Lecornu tha se kryetarëve të bashkive po u jepej mundësia të vendosnin shtetrrethim aty ku vlerësohej i nevojshëm. Ai nuk e përjashtoi shpalljen e gjendjes së jashtëzakonshme.
Lecornu njoftoi fonde për rimëkëmbjen e zonave të dëmtuara, duke deklaruar se qeveria synon t’ua ngarkojë kostot personave përgjegjës.
“Do të miratohet një ligj për të gjetur mënyra që ata që kanë dëmtuar pronat të detyrohen të paguajnë”, tha kryeministri.
Ai paralajmëroi edhe një skemë mbështetjeje për punonjësit që nuk kanë mundur të punojnë për shkak të trazirave dhe dëmtimit të bizneseve.
Macron refuzoi dorëheqjen e ministrit të Brendshëm
Ministri i Brendshëm, Laurent Nuñez, pranoi se policia kishte humbur kontrollin në disa qytete. Sipas një deklarate të Pallatit Élysée, ai ofroi dorëheqjen të dielën, por presidenti Emmanuel Macron e refuzoi, duke kërkuar vazhdimësinë e drejtimit të forcave të rendit.
Macron kërkoi gjithashtu transparencë për atë që i cilësoi si dështime në mbledhjen e informacionit dhe parashikimin e situatës.
Nuñez njoftoi se 200 hetues po shqyrtojnë pamjet e kamerave të sigurisë për të identifikuar personat që mund të kenë organizuar trazirat.
Mijëra biznese të prekura
Sipas kreut të Dhomave të Tregtisë dhe Industrisë së Francës, mbi 2.000 dyqane dhe biznese të tjera janë prekur drejtpërdrejt nga dhuna.
Autoritetet kanë ngritur shqetësimin se mallra të plaçkitura po ofrohen për shitje në platformat online. Vinted deklaroi se ka nisur heqjen e njoftimeve të lidhura me grabitjet dhe ka shtuar monitorimin e përmbajtjeve të dyshimta.
Protestat nisën muajin e kaluar me kërkesa për kushte më të mira në arsim, por më pas përfshinë kundërshtime ndaj kostos së jetesës, çmimeve të karburanteve dhe gjendjes së shërbimeve publike.
Rreth 550.000 persona morën pjesë në demonstratat e fundjavës. Në disa qytete, grupe të dhunshme, përfshirë persona të maskuar, u përfshinë në djegien e automjeteve dhe ndërtesave, si dhe në plaçkitjen e bizneseve.
