Ministrja e Arsimit, Mirela Kumbaro, njoftoi ngritjen e një ekipi psikologësh për të mbështetur nxënësit, prindërit dhe familjet e prekura nga situata e krijuar gjatë protestave në Tiranë.
Në një takim me drejtorët e shkollave, ku ishte i pranishëm edhe kryeministri Edi Rama, Kumbaro theksoi se komunikimi me fëmijët dhe familjet është thelbësor për përballimin e pasojave të dhunës.
“Çdo orë që ua merr dhuna, janë orë të rrëmbyera nga jeta e këtyre fëmijëve. Komunikimi është çelësi i suksesit. Kemi ngritur një ekip psikologësh që duhet të jenë në dispozicion të familjeve dhe prindërve”, deklaroi ministrja.
Ajo e cilësoi situatën traumatike për fëmijët dhe kërkoi angazhim për të parandaluar pasoja afatgjata në jetën e tyre.
Duke u ndalur te vijimi i mësimit, Kumbaro tha se problematika më e madhe është përqendruar në Tiranë, ndërsa në shkollat e tjera procesi mësimor ka vijuar normalisht, me pak episode.
Ministrja pretendoi gjithashtu se grupe nga jashtë shkollave po përpiqen të shkaktojnë trazira dhe të cenojnë funksionimin e tyre.
“Janë grupe që vijnë nga jashtë oborrit të shkollave që tentojnë të prekin stabilitetin dhe të krijojnë turbullira”, u shpreh Kumbaro.
