Forcat e Armatosura të Shqipërisë dhe ato të Shteteve të Bashkuara zhvilluan një trajnim të përbashkët për misionet e evakuimit mjekësor dhe operacionet e kërkim-shpëtimit.
Aktiviteti u zhvillua në Bazën Ajrore të Farkës dhe në Komandën e Forcës Tokësore, bëri të ditur Ambasada amerikane në Tiranë.
Gjatë trajnimit u përgatitën dhe u pajisën kabinat e helikopterëve UH-60 Black Hawk për realizimin e misioneve të evakuimit mjekësor. U testuan gjithashtu pajisjet për monitorimin e pacientëve, të cilat do të mundësojnë ofrimin e kujdesit mjekësor gjatë fluturimit.
Aktivitetin e ndoqi nga afër gjeneralmajorja Lisa Hou, drejtoreshë e Zyrës së Shërbimeve Mjekësore në Byronë e Gardës Kombëtare të Shteteve të Bashkuara.
Sipas Ambasadës amerikane, Hou vlerësoi profesionalizmin dhe aftësitë e personelit të Forcës Ajrore shqiptare.
“Ky bashkëpunim i vazhdueshëm forcon më tej partneritetin ndërmjet forcave amerikane dhe shqiptare, në mbështetje të operacioneve reale të kërkim-shpëtimit”, thuhet në njoftim.
Trajnimi synon të rrisë gatishmërinë e Forcave të Armatosura shqiptare për ndërhyrje në situata emergjente, transportimin e të plagosurve dhe ofrimin e ndihmës mjekësore në bordin e helikopterëve Black Hawk.
