Shqipëria, një nga destinacionet turistike me rritjen më të shpejtë në Evropë, mund të përballet me ndryshime të rëndësishme për vizitorët e huaj nëse bëhet pjesë e Bashkimit Evropian. Kështu shkruan revista amerikane Travel Off Path, e cila analizon ndikimin që anëtarësimi në BE mund të ketë për turistët, veçanërisht për qytetarët amerikanë dhe nomadët digjitalë.

Sipas artikullit, Shqipëria është bërë një destinacion gjithnjë e më i preferuar falë kostos së ulët të jetesës, procedurave të thjeshta të hyrjes dhe mundësisë që qytetarët amerikanë të qëndrojnë deri në një vit pa vizë.

Aktualisht, Shqipëria nuk është pjesë e Bashkimit Evropian dhe për këtë arsye përcakton në mënyrë të pavarur politikat e saj të vizave dhe emigracionit. Kjo i lejon vendit të ofrojë lehtësi që nuk zbatohen në shumicën e vendeve evropiane.

Një nga përfitimet më të mëdha është e drejta ekskluzive për shtetasit amerikanë që të qëndrojnë në Shqipëri deri në 365 ditë pa vizë, pa autorizime paraprake apo procedura shtesë.

Megjithatë, revista paralajmëron se ky regjim mund të ndryshojë nëse Shqipëria anëtarësohet në Bashkimin Evropian.

Artikulli thekson se procesi i integrimit evropian është përshpejtuar ndjeshëm vitet e fundit, ndërsa zgjerimi është kthyer në një nga prioritetet kryesore të Brukselit, sidomos pas luftës në Ukrainë dhe shqetësimeve për ndikimin rus në Ballkan.

Një moment i rëndësishëm ishte 15 korriku 2026, kur Shqipëria mbylli përkohësisht tre kapituj negociues brenda një dite, gjatë asaj që Bashkimi Evropian e quajti “Super e Marta”, një zhvillim që u konsiderua i paprecedentë për ritmin e negociatave.

Sipas komisioneres evropiane për Zgjerimin, Marta Kos, nëse procesi vijon sipas planit, Mali i Zi mund të anëtarësohet në BE në vitin 2028, ndërsa Shqipëria mund ta ndjekë në vitin 2029.

Artikulli vlerëson se anëtarësimi në Bashkimin Evropian do të sillte përfitime të rëndësishme për qytetarët shqiptarë, por edhe ndryshime të ndjeshme për turistët.

Një prej tyre lidhet me rritjen graduale të kostos së jetesës. Sipas revistës, Shqipëria mbetet një nga vendet më të përballueshme në Evropë, ku një apartament modern me një dhomë gjumi mund të merret me qira për rreth 400 dollarë në muaj, ndërsa një natë në një apartament buzë detit në Vlorë ose Sarandë kushton mesatarisht rreth 120 dollarë.

Megjithatë, përvoja e vendeve të tjera që janë bërë pjesë e BE-së tregon se investimet, fondet evropiane dhe rritja e pagave sjellin gradualisht edhe rritje të çmimeve.

Artikulli përmend shembullin e Polonisë, e cila nga një prej ekonomive më të dobëta në Evropën Qendrore është shndërruar në një nga ekonomitë me rritjen më të shpejtë.

Një tjetër ndryshim i rëndësishëm pritet të jetë harmonizimi i politikave shqiptare të vizave me ato të Bashkimit Evropian.

Nëse Shqipëria bëhet anëtare e BE-së, qytetarët amerikanë nuk do të mund të përfitojnë më nga e drejta aktuale për të qëndruar deri në një vit pa vizë. Po ashtu, vendi do të duhet të zbatojë Sistemin Evropian të Hyrje-Daljeve (EES), i cili parashikon regjistrimin e gjurmëve të gishtërinjve dhe fotografisë biometrike të udhëtarëve nga vendet jashtë BE-së gjatë hyrjes së parë.

Sipas autorëve, kjo mund të sjellë procedura më të gjata kufitare në krahasim me sistemin aktual, ku hyrja në Shqipëri realizohet zakonisht brenda pak minutash.

Revista sqaron gjithashtu se anëtarësimi në Bashkimin Evropian nuk nënkupton automatikisht hyrjen në Zonën Shengen.

Si shembuj përmenden Rumania dhe Bullgaria, të cilat iu bashkuan BE-së në vitin 2007, por u bënë pjesë e Shengenit vetëm në vitin 2025, si dhe Kroacia, e cila iu bashkua zonës së lëvizjes së lirë dhjetë vjet pas anëtarësimit në BE.

Për këtë arsye, edhe nëse Shqipëria anëtarësohet në vitin 2029, është e mundur që për një periudhë të mbetet jashtë Zonës Shengen.

Në këtë rast, sipas Travel Off Path, qytetarët amerikanë ka të ngjarë të lejohen të qëndrojnë deri në 90 ditë brenda një periudhe 180-ditore vetëm në Shqipëri, pa u llogaritur së bashku me ditët e kaluara në vendet e Shengenit.

Artikulli përfundon se, edhe me ndryshimet që mund të sjellë anëtarësimi në Bashkimin Evropian, Shqipëria pritet të mbetet një destinacion tërheqës për turistët dhe nomadët digjitalë, falë pozicionit të saj strategjik, zhvillimit të turizmit dhe nivelit të lartë të sigurisë, duke u vlerësuar me 84 nga 100 pikë në “Traveler Safety Index”.