Zgjedhjet e mesmandatit të 3 nëntorit mund të shënojnë arritje historike për gratë në politikën amerikane, ku përfaqësimi i tyre mbetet ndjeshëm nën peshën që kanë në popullsi.
Sipas të dhënave të cituara nga DW, gratë përbëjnë rreth 51% të popullsisë së Shteteve të Bashkuara, por mbajnë vetëm 28,4% të vendeve në Kongres dhe 14 nga 50 postet e guvernatorëve.
Ekspertja Kelly Dittmar e lidh këtë pabarazi me pengesat strukturore, kostot e larta të fushatave, aksesin më të kufizuar te donatorët e mëdhenj dhe stereotipet gjinore. Sipas saj, drejtuesit politikë meshkuj kanë gjithashtu prirjen të rekrutojnë më shpesh burra si kandidatë.
Dallime të mëdha mes dy partive
Në Dhomën e Përfaqësuesve, numri i grave demokrate është dukshëm më i lartë se ai i republikaneve: 95 kundrejt 30.
Në Senat, gratë mbajnë 27% të vendeve. Garat për këtë institucion kërkojnë financime më të mëdha dhe ofrojnë më pak mundësi kandidimi, duke krijuar pengesa shtesë për rritjen e përfaqësimit.
Kandidaturat që synojnë të thyejnë barriera
Në Minesota, demokratja Peggy Flanagan synon të bëhet gruaja e parë autoktone amerikane e zgjedhur në Senat, nëse fiton garën.
Në të njëjtin shtet, Amy Klobuchar kandidon për postin e guvernatores.
Një tjetër garë me rëndësi është ajo në Xhorxhia, ku Keisha Lance Bottoms synon të bëhet guvernatorja e parë afrikano-amerikane në historinë e shtetit. Ajo mbështetet nga ish-presidenti Barack Obama, ndërsa rivali republikan Rick Jackson ka mbështetjen e presidentit Donald Trump.
Rezultatet do të përcaktojnë nëse këto kandidatura do të përkthehen në më shumë vende për gratë në Kongres dhe në drejtimin e shteteve amerikane.
