Ansambli Kombëtar i Këngëve dhe Valleve Popullore në Edinburg, spektakël për promovimin e kulturës shqiptare

22 Nov 2026 • 13:39
Shpërndaje:

Pas suksesit të shënuar në Londër gjatë muajit korrik, Ansambli Kombëtar i Këngëve dhe Valleve Popullore do të ngjitet për herë të parë në skenën skoceze, duke sjellë në Edinburg një spektakël kushtuar muzikës, valleve dhe trashëgimisë kulturore shqiptare.

Ministri i Turizmit, Kulturës dhe Sportit, Blendi Gonxhja, njoftoi se më 23 nëntor Ansambli Kombëtar do të prezantojë spektaklin “Albania Through Byron’s Eyes” (Shqipëria përmes syve të Bajronit), një shfaqje artistike që synon të promovojë traditat dhe identitetin kulturor shqiptar përpara publikut ndërkombëtar.

Sipas ministrit, spektakli do të jetë “një festë e muzikës, valleve, kostumeve dhe traditave tona kombëtare”, duke sjellë në skenë elemente përfaqësuese të folklorit dhe trashëgimisë shqiptare.

Reklamë Ola

Ky aktivitet vjen si pjesë e përpjekjeve për të zgjeruar praninë e artit shqiptar në skenat evropiane dhe për të krijuar mundësi të reja bashkëpunimi kulturor me komunitetet shqiptare jashtë vendit.

Ministria e Turizmit, Kulturës dhe Sportit, përmes programit kombëtar CulturALB dhe në bashkëpunim me Teatrin Kombëtar të Operës, Baletit dhe Ansamblit Popullor (TKOBAP), mbështet pjesëmarrjen e Ansamblit Kombëtar në këtë aktivitet ndërkombëtar.

Reklamë InterMedika

Sipas ministrisë, kjo nismë është pjesë e angazhimit për promovimin e artit dhe kulturës shqiptare, forcimin e pranisë së institucioneve kulturore në Evropë dhe ruajtjen e lidhjeve me diasporën.

Spektakli organizohet nga “Empowered Women of Diaspora”, në bashkëpunim me Agjencinë Kombëtare të Diasporës, duke synuar të krijojë një urë lidhëse mes trashëgimisë artistike shqiptare dhe publikut në Skoci.

Titulli “Albania Through Byron’s Eyes” i referohet poetit të njohur britanik Lord Bajron, i cili gjatë udhëtimeve të tij në fillim të shekullit XIX vizitoi territoret shqiptare dhe përshkroi përshtypjet e tij mbi vendin, njerëzit dhe traditat e tyre.

Përmes këtij koncepti, spektakli synon të ndërthurë historinë dhe trashëgiminë kulturore shqiptare me një këndvështrim të njohur në kulturën britanike.

Pjesëmarrja e Ansamblit Kombëtar në Edinburg përbën një tjetër hap në promovimin ndërkombëtar të folklorit shqiptar, pas shfaqjes së zhvilluar në Londër gjatë verës.

Aktiviteti pritet të mbledhë përfaqësues të komunitetit shqiptar në Skoci, dashamirës të artit dhe publikut vendas, duke ofruar një mundësi për njohjen nga afër të muzikës dhe valleve tradicionale shqiptare.

Përmes këtij spektakli, Ansambli Kombëtar i Këngëve dhe Valleve Popullore vijon misionin e tij për ruajtjen dhe përcjelljen e trashëgimisë kulturore, duke e prezantuar atë përtej kufijve të Shqipërisë dhe duke forcuar lidhjet kulturore me diasporën.