Presidentja e Komisionit Europian, Ursula von der Leyen, mbërrin sot në Tiranë, duke nisur nga Shqipëria turin e saj të gjashtë vjetor në Ballkanin Perëndimor. Vizita rajonale do të zhvillohet nga 30 shtatori deri më 2 tetor.
Gjatë qëndrimit në Tiranë, Von der Leyen do të zhvillojë takime me Presidentin Bajram Begaj dhe kryeministrin Edi Rama. Në qendër të bisedimeve pritet të jenë hapat e ardhshëm të Shqipërisë drejt anëtarësimit në Bashkimin Europian dhe procesi i integrimit gradual.
Presidentja e Komisionit do të vizitojë gjithashtu shkollën “Emin Duraku” në Tiranë, e rindërtuar me financim të Bashkimit Europian pas dëmtimeve të shkaktuara nga tërmeti i vitit 2019. Gjatë turit të saj rajonal, ajo do të vizitojë edhe projekte të tjera të financuara nga BE-ja.
Vizita zhvillohet në një moment të rëndësishëm për procesin e zgjerimit. Komisioni Europian thotë se diskutimet do të përqendrohen te hapat konkretë që duhet të ndërmarrin vendet partnere në rrugën drejt BE-së, si dhe te integrimi gradual i rajonit, i mbështetur nga Plani i Rritjes prej 6 miliardë eurosh për Ballkanin Perëndimor.
Pas Shqipërisë, Von der Leyen do të udhëtojë më 1 tetor drejt Kosovës, ku do të takohet me presidenten në detyrë Albulena Haxhiu dhe kryeministrin Albin Kurti. Më pas, po të njëjtën ditë, ajo do të vijojë drejt Malit të Zi për takime me presidentin Jakov Milatović dhe kryeministrin Milojko Spajić.
Turi do të përfundojë të premten, më 2 tetor, në Maqedoninë e Veriut, me takime me presidenten Gordana Siljanovska-Davkova dhe kryeministrin Hristijan Mickoski.
Serbia dhe Bosnje-Hercegovina nuk janë përfshirë në itinerarin e kësaj vizite. Komisioni Europian ka sqaruar se, për shkak të zgjedhjeve të ardhshme në të dyja vendet, Von der Leyen synon t’i vizitojë ato në një moment të mëvonshëm.
Von der Leyen ka theksuar gjatë këtij viti se Bashkimi Europian nuk do të jetë i plotë pa vendet e Ballkanit Perëndimor, ndërsa turi i saj i ri vjen në një periudhë kur Brukseli po diskuton hapat e ardhshëm të procesit të zgjerimit.
