“AfD po promovon dhe mbështet shkëputjen e Tirolit të Jugut nga Italia”, këto ishin fjalët e Ministrit të Jashtëm italian, Antonio Tajani për partinë gjermane të ekstremit të djathtë.
“Po i referohem një ngjarjeje shumë serioze dhe ne do të kërkojmë të dimë se si mund të ketë ndodhur kjo, brenda parlamentit gjerman”, tha ai në një intervistë me Corriere della Sera.
“Sidoqoftë, ua them këtë nacionalistëve vendas, konfirmohet edhe një herë se AfD është një parti anti-italiane, armiku më i keq i vendit tonë”, shtoi kreu i diplomacisë italiane.
Siç nënvizon shtypi italian, referenca e Tajanit është për një konferencë që do të organizohet nesër nga Alternativa për Gjermaninë në zyrat e Bundestagut, parlamentit të vendit, me rastin e 80-vjetorit të nënshkrimit të marrëveshjes italo-austriake për Tirolin e Jugut. Ky është një rajon që i përket Italisë si rajon autonom dhe quhet Alto Adige në italisht.
“Posteri i konferencës ishte i qartë: Tiroli i Jugut shfaqet si një shtet i veçantë dhe i pavarur”, tha Antonio Tajani.
“Nuk ka një çështje të tillë, është diçka budallallëk. Në fund të fundit, po flasim për një rajon që i përkiste Austrisë dhe jo Gjermanisë”, komentoi, nga ana e tij, eurodeputeti i AfD-së, Mark Jongen.
Së fundmi, eurodeputetët e partisë italiane Forza Italia, udhëheqës i së cilës është Tajani, njoftuan se do t’i kërkojnë Komisionit Evropian të marrë një qëndrim për këtë çështje specifike.
