Kreu i Partisë Popullore në Spanjë, Alberto Núñez Feijóo, ka premtuar ndryshime në ligjet për abortin dhe eutanazinë nëse fiton zgjedhjet e 29 nëntorit. Ai konfirmoi gjithashtu se mund të formojë një koalicion qeverisës me partinë e ekstremit të djathtë Vox, nëse rezultati zgjedhor e bën të nevojshme.
“Objektivi im kryesor është ta largoj Pedro Sánchezin nga qeveria dhe të hap një kapitull të ri për vendin tim”, deklaroi Feijóo të premten në një intervistë për radion Cadena SER.
Partia Popullore kryeson sondazhet, por sipas matjeve aktuale do të kishte nevojë për mbështetjen e Vox-it për të siguruar shumicën parlamentare.
“Nëse më kërkojnë të siguroj stabilitet me Vox-in, do ta bëj”, tha ai, duke argumentuar se do të respektojë mesazhin e votuesve.
Feijóo mohoi se kishte zhvilluar negociata zyrtare për ndarjen e ministrive. Sipas POLITICO-s, në rast marrëveshjeje, Vox pritet të kërkojë një post zëvendëskryeministri dhe të paktën një ministri, siç ka vepruar në koalicionet rajonale me konservatorët.
Gjatë intervistës, Feijóo premtoi rishikimin e ligjit për abortin, të ndryshuar në vitin 2023 për t’u mundësuar vajzave 16 dhe 17 vjeçe ndërprerjen e shtatzënisë pa pëlqimin e prindërve.
Ai kërkon përfshirjen e prindërve ose kujdestarëve ligjorë në vendimmarrje, duke argumentuar se mbështetja familjare mund të ndikojë në zgjedhjen për të vazhduar shtatzëninë.
Mbetet e paqartë nëse ky ndryshim do të kënaqte Vox-in, i cili kërkon shfuqizimin e plotë të ligjit aktual dhe kundërshton njohjen e abortit si një e drejtë ligjore.
Kreu konservator u zotua gjithashtu të kufizojë aksesin në eutanazi, të legalizuar në Spanjë në vitin 2021 për të rritur me sëmundje të rënda e të pashërueshme ose gjendje kronike që shkaktojnë paaftësi të rëndë, sipas kushteve të përcaktuara ligjore.
“Spanja duhet të bëhet vendi ku është më e lehtë të mbështetet jeta”, deklaroi ai.
Një tjetër premtim është shkrirja e Ministrisë së Barazisë si institucion më vete, në kuadër të zvogëlimit të qeverisë. Feijóo këmbënguli se kjo nuk cenon angazhimin e tij për barazinë mes grave dhe burrave.
Sa i përket ekonomisë, ai nuk u angazhua shprehimisht për një rritje tjetër të pagës minimale. Sipas raportimit, ajo është rritur tetë herë gjatë qeverisjes së Sánchezit, nga 735 euro në muaj në vitin 2018 në 1 221 euro aktualisht.
Feijóo tha se synimi i tij është rritja e pagës mesatare, me qëllim përmirësimin e fuqisë blerëse të qytetarëve.
