Prokuroria Publike Evropiane (EPPO) po heton Partinë Popullore Evropiane (PPE) për dyshime mbi keqpërdorimin e fondeve në kontratat me dy konsulentë grekë përpara zgjedhjeve evropiane të vitit 2024, sipas një investigimi të përbashkët mediatik.
Gazeta gjermane Süddeutsche Zeitung, platforma holandeze Follow the Money dhe media greke Inside Story raportojnë se kontratat kapnin një vlerë prej më shumë se gjysmë milioni eurosh.
Dy konsulentët ishin angazhuar për komunikimin e partisë në prag të fushatës zgjedhore. Megjithatë, Parlamenti Evropian, i cili financon partitë politike evropiane, refuzoi rimbursimin e plotë të shpenzimeve, duke i konsideruar kostot të tepruara.
Sipas raportimit, Parlamenti mbuloi vetëm pagesat fillestare prej 110 mijë eurosh, ndërsa rreth 350 mijë euro iu desh t’i paguante vetë PPE-ja.
Ish-punonjës të partisë u thanë gazetarëve se tarifat ishin joproporcionale me punën e dorëzuar. Konsulentët e kundërshtuan këtë vlerësim dhe deklaruan se më pas kishin kthyer një pjesë të parave.
EPPO-ja nuk e konfirmoi dhe as e mohoi ekzistencën e hetimit. Institucioni tha se nuk mund të komentojë kur kjo mund të rrezikojë procedura në zhvillim ose rezultatin e tyre.
Një zëdhënës i PPE-së deklaroi se partia nuk është njoftuar zyrtarisht për çështjen.
“PPE-ja respekton plotësisht pavarësinë dhe mandatin e autoriteteve përkatëse dhe mbetet e angazhuar t’u ofrojë transparencë të plotë dhe bashkëpunim të plotë, nëse kjo kërkohet”, u shpreh zëdhënësi.
