Kryeministri i Shqipërisë, Edi Rama në një prononcim për gazeten gjermane “Bild Zeitung“ ka kritikuar ashpër shprehjen e moderatorit të njohur gjerman të ZDF-së Markus Lanz, i cili ka thënë në emisionin e tij gjatë një interviste “lojëra mashtruese alla shqiptare“.
Kryeministri i Shqipërisë, Edi Rama, i cili të djelën (26.01) do të zhvillojë një vizitë në Berlin, i tha Bild Zeitung, se: “Jam i befasuar, që në një emision kaq të njohur televiziv të ZDF-së mund të dëgjosh një gjuhë të tillë! Unë nuk e di, nëse është ky një gabim i rëndomtë apo një etiketim racist ndaj shqiptarëve si popull, por sido që të jetë kjo është një shprehje e dëmshme.”
Gjatë një interviste me ministrin e Komunikacionit kristiandemokratin Andreas Scheuer moderatori Markus Lanz duke replikuar ndaj përgjigjeve devijuese të ministrit lidhur me gabimet e këtij të fundit sa i përket taksës së propozuar prej tij për të huajt në autostradrat gjermane, iu kundërvu ministrit me fjalët: “Eshtë kjo një lojë mashtruese alla shqiptare!”
Por pavarësisht këtij devijimi të moderatorit Lanz, kryeministri shqiptar i tha Bild, se gëzohet për vizitën në Berlin. „Kancelarja Merkel është një paraprijëse e Europës dhe një figurë frymëzuese për të gjithë ne, që luftojmë për t’u antarësuar një ditë në Europë, duke i reformuar dhe ndryshuar për të mirë vendet tona kandidate nga Ballkani Perëndimor. Takimi me të është për mua gjithmonë një nder dhe gëzim i veçantë, por kësaj here për mua si kryeministër i një vendi, që nëntorin e kaluar u godit rëndë nga një tërmet i tmerrshëm, ky takim do të ketë një rëndësi vendimtare”, ka theksuar Rama për Bild.
Eunews.al
