Presidenti rus Vladimir Putin ka mohuar pretendimet se Moska po nxit protestat masive në qytetet evropiane, duke i cilësuar ato si një “ekzagjerim të qartë”.
Në një intervistë për transmetuesin rus VGTRK, të publikuar të dielën, Putin kritikoi udhëheqësit evropianë, të cilët, sipas tij, po ua atribuojnë aktorëve të jashtëm përgjegjësinë për tensionet në vendet e tyre.
“Rusia është akuzuar gjithmonë për të gjitha mëkatet e mundshme”, deklaroi kreu i Kremlinit.
Putin tha se fillimisht ishte befasuar nga pretendimet që i lidhnin protestat me politikat e administratës amerikane dhe mbështetjen e saj për partitë e lëvizjet e djathta në Evropë.
Sipas tij, ishte e papritur që drejtuesit evropianë të kritikonin Shtetet e Bashkuara, të cilat i përshkroi si aleatin dhe mbrojtësin e tyre kryesor ushtarak. Më pas, shtoi ai, akuzat u përqendruan sërish te Rusia.
Presidenti rus pretendoi se këto qëndrime pasqyrojnë dobësinë e udhëheqësve evropianë dhe mungesën e gatishmërisë për të marrë përgjegjësi. Sipas tij, në vend që të analizojnë shkaqet e protestave dhe të kërkojnë zgjidhje, ata fajësojnë vende të tjera.
Deklaratat vijnë ndërsa protestat studentore në Francë vijojnë prej disa javësh dhe përplasjet mbi shkaqet e tyre janë shtrirë edhe në diplomaci.
Më 21 tetor, ministri i Jashtëm francez, Jean-Noël Barrot, deklaroi në një konferencë të Organizatës për Bashkëpunim dhe Zhvillim Ekonomik se protestuesit po përdorin narrativa armiqësore që, sipas tij, vijnë nga Rusia, Kina, Irani dhe komuniteti MAGA.
Zëdhënësi i Kremlinit, Dmitry Peskov, i kishte hedhur poshtë më 19 tetor pretendimet për përfshirjen ruse, duke i quajtur absurde.
Ndërkohë, presidenti amerikan Donald Trump i ka lidhur trazirat me migracionin masiv.
