Pas disa muajsh ndërprerjeje, Komisioni i Posaçëm Parlamentar për Reformën Zgjedhore pritet të mblidhet këtë të hënë, në një klimë tensionesh politike mes Partisë Socialiste dhe Partisë Demokratike, pas protestave të dhunshme të fundjavës në kryeqytet.
Mbledhja pritet të zhvillohet pa një dakordësi paraprake mes dy forcave kryesore politike për çështjet që do të diskutohen.
Sipas burimeve nga Partia Demokratike, të cituara nga Top Channel, agjenda e mbledhjes është përcaktuar në mënyrë të njëanshme nga socialistët, të cilët synojnë përshtatjen e legjislacionit zgjedhor me ndarjen e re territoriale që parashikon 46 bashki.
Në rendin e ditës janë përfshirë dy çështje kryesore: diskutimi i detyrimeve që rrjedhin nga legjislacioni për vetëqeverisjen vendore dhe vijimi i shqyrtimit të projektligjit “Për financimin e partive politike”, së bashku me çështjet e tjera të mbetura të reformës.
PD kërkon zbatimin e rekomandimeve të OSBE/ODIHR
Bashkëkryetari demokrat i komisionit, Oerd Bylykbashi, ka kërkuar që reforma të përqendrohet te zbatimi i rekomandimeve të OSBE/ODIHR dhe garantimi i ndarjes së shtetit nga partia në pushtet.
Një tjetër pikë ku palët kanë qëndrime të ndryshme është sistemi zgjedhor.
Partia Demokratike mbështet vendosjen e listave 100% të hapura, përfshirë edhe zgjedhjet për këshillat bashkiakë.
Nga ana tjetër, socialistët kanë shprehur gatishmërinë për të diskutuar ndryshimet në sistemin zgjedhor, por kërkojnë që paketa e ndryshimeve kushtetuese të përfshijë edhe reduktimin e numrit të deputetëve nga 140 në 101.
Komisioni i Posaçëm Parlamentar për Reformën Zgjedhore bashkëdrejtohet nga Oerd Bylykbashi i Partisë Demokratike dhe Damian Gjiknuri i Partisë Socialiste.
Mandati i komisionit përfundon në fund të nëntorit, ndërsa mbetet për t’u parë nëse palët do të arrijnë një marrëveshje për çështjet kryesore të reformës brenda këtij afati.
