Ministri i Jashtëm gjerman kundër taksës në Hormuz: Kalimi duhet të mbetet i lirë sipas ligjit ndërkombëtar
Ministri i Jashtëm i Gjermanisë, Johann Wadephul, ka shprehur kundërshtimin e Berlinit ndaj çdo përpjekjeje për vendosjen e një takse në Ngushticën e Hormuzit, duke theksuar se kjo rrugë strategjike detare duhet të mbetet e hapur dhe e lundrueshme lirisht në përputhje me të drejtën ndërkombëtare.
Gjatë një forumi publik në Ministrinë e Jashtme në Berlin, Wadephul deklaroi se Gjermania po ndjek me vëmendje zhvillimet pas memorandumit të mirëkuptimit mes Shteteve të Bashkuara dhe Iranit, i cili synon t’i japë fund tensioneve dhe konfliktit në rajon.
Sipas tij, dokumenti përmban ende paqartësi lidhur me garantimin e plotë të lirisë së lundrimit në Ngushticën e Hormuzit.
“Ngushtica e Hormuzit duhet të mbetet e lundrueshme lirisht sipas ligjit ndërkombëtar detar. Memorandumi përmban formulime të paqarta nëse ky kalim është vërtet 100 për qind i garantuar”, u shpreh Wadephul.
Ai theksoi se qeveria gjermane do t’i kushtojë rëndësi të veçantë ruajtjes së lirisë së lundrimit në këtë korridor jetik për tregtinë globale të energjisë dhe se kjo çështje do të merret parasysh në çdo vendim të ardhshëm lidhur me sanksionet ndaj Iranit.
Wadephul shtoi se nëse sigurohet kalimi i lirë dhe stabiliteti në rajon, çmimet e naftës mund të normalizohen relativisht shpejt në tregjet ndërkombëtare.
Deklarata vjen pasi presidenti amerikan Donald Trump kishte paralajmëruar më herët mundësinë e vendosjes së një takse për anijet që kalojnë në Ngushticën e Hormuzit, duke argumentuar se SHBA mund të kompensohej për rolin e saj në garantimin e sigurisë në rajon.
