Riviera Shqiptare po tërheq gjithnjë e më shumë vëmendjen e mediave ndërkombëtare si një alternativë ndaj destinacioneve të njohura të Mesdheut. Këtë herë, media amerikane “Parade” e ka përfshirë bregdetin shqiptar mes destinacioneve që ekspertët e udhëtimeve rekomandojnë për turistët që kërkojnë bukuri natyrore, përvoja autentike dhe çmime më të përballueshme.
Në një artikull të autores Kelli Acciardo, Riviera Shqiptare sugjerohet si alternativë ndaj ishullit të famshëm grek të Santorinit, një prej destinacioneve më të vizituara në Europë.
Sipas artikullit, ndërsa vende si Santorini dhe Bregu i Amalfit vazhdojnë të tërheqin miliona turistë, udhëtarët mund të zbulojnë destinacione më pak të njohura, që ofrojnë peizazhe po aq mbresëlënëse, por me kosto më të ulëta.
Riviera Shqiptare, alternativë ndaj Santorinit
Këshilltarja e udhëtimeve Anna LaBrie, nga kompania “Going”, vlerëson se Shqipëria mund të jetë një zgjedhje tërheqëse për turistët që kërkojnë ujëra të kristalta dhe fshatra piktoreskë buzë detit.
“Riviera Shqiptare shtrihet përgjatë detit Jon dhe ofron ujëra po aq të kristalta e blu, si dhe fshatra piktoreskë të vendosur buzë shkëmbinjve”, shprehet LaBrie.
Sipas saj, bregdeti shqiptar mund të konkurrojë me ishujt grekë për nga bukuria natyrore, ndërsa çmimet e akomodimit janë dukshëm më të përballueshme.
Në artikull theksohet se hotelet ekonomike dhe bujtinat lokale në Rivierën Shqiptare mund të ofrojnë akomodim me çmime që nisin nga rreth 25 dollarë për natë, megjithëse kostot ndryshojnë sipas sezonit dhe vendndodhjes.
Kjo u jep turistëve mundësinë të shpenzojnë më shumë për gastronominë, aktivitetet dhe përvojat lokale, pa pasur domosdoshmërisht buxhetin që kërkojnë destinacionet më të famshme europiane.
Një tjetër avantazh i përmendur është mundësia për të shijuar peizazhet dhe perëndimet e diellit në vende potencialisht më pak të mbipopulluara.
Ekspertët këshillojnë destinacione përtej itinerareve tradicionale
Në artikullin e “Parade”, ekspertët e udhëtimeve sugjerojnë që turistët të mos kufizohen vetëm te destinacionet që dominojnë rrjetet sociale.
Sipas tyre, vende më pak të promovuara mund të ofrojnë një ndërthurje të natyrës, historisë, kulturës dhe gastronomisë, duke krijuar mundësi për përvoja më autentike.
Përfshirja e Rivierës Shqiptare në këto rekomandime është një tjetër vlerësim ndërkombëtar për potencialin turistik të bregdetit të vendit, veçanërisht për vizitorët që kërkojnë alternativa ndaj destinacioneve tradicionale të Mesdheut.
