Kosova në fokus të nismës së BE-së për integrim gradual në Tregun e Përbashkët Europian

Vendet e Ballkanit Perëndimor, përfshirë Kosovën, kanë marrë një sinjal të ri mbështetës nga disa shtete të Bashkimit Europian, të cilat po shtyjnë përpara një nismë që synon integrimin gradual të rajonit në Tregun e Përbashkët Europian.

Sipas raportimeve të Radio Evropa e Lirë, disa vende anëtare të BE-së kanë propozuar një plan që parashikon futjen progresive të vendeve të Ballkanit në tregun e brendshëm europian, si një mënyrë për të ruajtur ritmin e zgjerimit dhe për të nxitur reformat në vendet kandidate.

Nisma është propozuar në një dokument jopublik nga Austria, Çekia, Italia, Sllovakia dhe Sllovenia, dhe synon t’u japë vendeve të rajonit akses më të gjerë në katër liritë themelore të BE-së: lëvizjen e mallrave, shërbimeve, kapitalit dhe njerëzve.

Në qendër të diskutimeve është edhe mbështetja e mundshme politike nga kancelari gjerman Friedrich Merz, i cili shihet si një nga figurat që mund t’i japë peshë reale kësaj nisme brenda Bashkimit Europian.

Ai ka propozuar gjithashtu një model më fleksibël integrimi, ku vendet e Ballkanit Perëndimor do të mund të përfitonin qasje të privilegjuar në tregun e përbashkët dhe status vëzhguesi në disa struktura të BE-së, ndërsa Ukraina do të kishte status të veçantë si anëtare e asociuar pa të drejtë vote.

Në këtë debat, Kosova mbetet në fokus të veçantë, pasi është vendi i vetëm në rajon pa status kandidat për anëtarësim në BE, pavarësisht aplikimit të saj për integrim.

Ekspertët vlerësojnë se një integrim gradual në Tregun e Përbashkët mund të sjellë përfitime konkrete për ekonominë e Kosovës, duke hapur mundësi më të mëdha për eksport, investime dhe bashkëpunim ekonomik me vendet e BE-së.

Megjithatë, sipas analistëve, sfida mbetet nëse ky propozim do të marrë mbështetjen e plotë të të gjitha shteteve anëtare të BE-së dhe sa shpejt mund të kthehet në një politikë zyrtare.