Ministrja Delina Ibrahimaj ka vënë theksin te rëndësia e bashkëpunimit ekonomik mes Shqipërisë dhe Turqisë, si dhe te mundësitë që ofron integrimi rajonal për zhvillimin e bizneseve shqiptare.
Gjatë Forumit të Biznesit Ballkanik, të zhvilluar në Tiranë, u mblodhën sipërmarrës dhe përfaqësues të biznesit nga Shqipëria, Kosova, Maqedonia e Veriut, Mali i Zi dhe Turqia, me synimin për të krijuar partneritete të reja tregtare dhe investimi.
Përmes një postimi në rrjetet sociale, Ibrahimaj theksoi se Turqia mbetet një nga partnerët kryesorë ekonomikë të Shqipërisë, ndërsa forcimi i bashkëpunimit rajonal dhe afrimi me tregun europian krijojnë mundësi të reja për sipërmarrjet vendase.
“Turqia është një nga partnerët tanë kryesorë ekonomikë, ndërsa integrimi rajonal dhe afrimi me tregun europian krijojnë mundësi të reja për bizneset shqiptare”, shkroi Ibrahimaj.
Sipas saj, bashkëpunimi ekonomik duhet të përqendrohet në disa sektorë kryesorë, duke nisur nga tregtia dhe investimet, deri te prodhimi dhe eksportet.
Ministrja nënvizoi se zgjerimi i marrëdhënieve tregtare dhe krijimi i partneriteteve ndërmjet sipërmarrjeve të rajonit synojnë të forcojnë konkurrueshmërinë e ekonomisë shqiptare.
“Nga tregtia te investimet, prodhimi dhe eksportet. Ky është drejtimi i bashkëpunimit që synojmë të zhvillojmë, për një ekonomi më konkurruese dhe të integruar në tregjet ndërkombëtare”, u shpreh Ibrahimaj.
Forumi i Biznesit Ballkanik shërbeu si një hapësirë takimi mes përfaqësuesve të sipërmarrjes nga vendet pjesëmarrëse, me fokus zgjerimin e kontakteve ekonomike dhe identifikimin e mundësive të reja për bashkëpunim.
