Ministrat e Jashtëm të Bashkimit Evropian nuk arritën të hënën një marrëveshje për miratimin e paketës së 21-të të sanksioneve ndaj Rusisë, ndërsa ambasadorët e vendeve anëtare pritet të mblidhen sërish për të diskutuar një nga elementët kryesorë të saj: ngrirjen e tavanit të çmimit për eksportet e naftës ruse.

Përfaqësuesja e Lartë e BE-së për Politikën e Jashtme, Kaja Kallas, shprehu keqardhjen për mungesën e konsensusit.

“Po, më vjen keq që nuk kemi arritur marrëveshje për paketën e 21-të të sanksioneve”, deklaroi ajo pas takimit të ministrave në Bruksel.

Një nga masat kryesore të paketës është mbajtja e tavanit të çmimit të naftës ruse në 44.10 dollarë për fuçi. Nëse kjo masë nuk miratohet deri të mërkurën, mekanizmi i rishikimit automatik, i cili aktivizohet çdo gjashtë muaj, do ta rrisë kufirin për shkak të rritjes së çmimeve globale të naftës pas konfliktit mes Izraelit dhe Iranit, duke i sjellë Rusisë të ardhura më të larta nga eksportet.

Për të shmangur këtë skenar, ambasadorët e BE-së mund të zhvillojnë një tjetër takim të martën ose të mërkurën, dita e fundit përpara hyrjes në fuqi të rillogaritjes automatike.

Paketa e 21-të e sanksioneve është zbutur ndjeshëm gjatë javëve të fundit. Nga drafti përfundimtar është hequr propozimi për ndalimin e importeve të peshkut rus, ndërsa janë lehtësuar edhe kufizimet e planifikuara për vizat e ish-ushtarakëve rusë.

Megjithatë, Kallas theksoi se Bashkimi Evropian ka miratuar tashmë zgjatjen e disa sanksioneve ekzistuese ndaj Rusisë, përfshirë ato që lidhen me sulmet kibernetike dhe sistemin penitenciar rus.

Sipas saj, masat e miratuara deri tani, së bashku me paketën e 21-të që pritet të finalizohet, do të përfshijnë më shumë se 250 persona dhe subjekte në listën e sanksioneve të Bashkimit Evropian.