Presidenti ukrainas Volodymyr Zelensky ka nisur një tjetër riorganizim të qeverisë, ndërsa hetimet për korrupsion ndaj ambasadores së Ukrainës në Shtetet e Bashkuara, Olga Stefanishyna, kanë përshpejtuar ndryshimet në administratë.

Sipas zyrtarëve ukrainas, Stefanishyna pritet të rikthehet në Ukrainë, ndërsa Kievi synon të emërojë një ambasador të ri në Uashington në një moment të rëndësishëm për marrëdhëniet me SHBA-në.

Ambasadorja është objekt i disa hetimeve të Byrosë Kombëtare Kundër Korrupsionit dhe Prokurorisë Speciale Kundër Korrupsionit. Çështjet lidhen me një rast të dyshuar për përvetësim fondesh në Ministrinë e Drejtësisë, pasuri shtetërore të përfituara nga ish-bashkëshorti i saj dhe një apartament luksoz në Kiev, të regjistruar në emër të prindërve të saj, i cili nuk ishte deklaruar fillimisht. Stefanishyna ka mohuar çdo shkelje dhe deri më tani nuk është ngritur asnjë akuzë zyrtare ndaj saj.

Në një reagim për mediat, ajo deklaroi se po bashkëpunon plotësisht me autoritetet hetimore dhe se largimi i saj nga posti nuk lidhet me hetimet në zhvillim.

Ndërkohë, kryeministrja Yulia Svyrydenko përflitet si kandidatja kryesore për të zëvendësuar Stefanishynën në postin e ambasadores në Uashington. Svyrydenko konsiderohet një figurë me marrëdhënie të mira me administratën amerikane dhe ka luajtur një rol kyç në arritjen e marrëveshjes për mineralet strategjike mes Ukrainës dhe SHBA-së.

Riorganizimi pritet të prekë edhe disa ministri të tjera. Sipas burimeve në Kiev, prej muajsh po planifikohen ndryshime në Ministrinë e Drejtësisë, atë të Transformimit Dixhital, Arsimit, Infrastrukturës dhe Çështjeve të Veteranëve, si dhe në sektorët e politikës së jashtme dhe zbatimit të ligjit.

Në qarqet politike ukrainase po qarkullon edhe emri i Serhii Koretskyi, drejtues i kompanive shtetërore të energjisë Naftogaz dhe Ukrnafta, si kandidat i mundshëm për postin e kryeministrit. Burime pranë qeverisë argumentojnë se sfidat që lidhen me përgatitjet për dimrin, sulmet ruse ndaj infrastrukturës energjetike dhe menaxhimi i rajoneve pranë vijës së frontit kërkojnë një ekip të ri drejtues.

Presidenti Zelensky nuk ka bërë ende të ditur se kush do të jetë kryeministri i ardhshëm apo se kur do të finalizohen ndryshimet në kabinet.