Kryeministri britanik Andy Burnham ka lënë të hapur mundësinë e rikthimit të lëvizjes së lirë mes Mbretërisë së Bashkuar dhe Bashkimit Evropian, ndërsa palët përgatiten për samitin e liderëve më 20 nëntor.
Në një intervistë për Sunday Times, Burnham sugjeroi se kjo çështje nuk do të ishte një vijë e kuqe në negociata. Megjithatë, ai theksoi se nuk dëshiron të nxitojë drejt një qëndrimi përfundimtar.
“Lëvizja e lirë kishte sfida shumë të rëndësishme dhe kam folur për to gjatë periudhës sime të mëparshme në parlament”, deklaroi ai.
Sipas Burnhamit, prirjet e emigracionit kanë ndryshuar që nga referendumi i vitit 2016, kur britanikët votuan për largimin nga BE-ja. Ai bëri dallimin mes emigracionit të asaj periudhe, kur njerëzit vinin dhe më pas ktheheshin në vendet e tyre, dhe situatës aktuale.
“Ekuilibri i emigracionit ka ndryshuar që atëherë, apo jo? Mendoj se duhet të kemi një diskutim të sinqertë për këto çështje”, u shpreh kryeministri.
Qëndrimi shënon një ndryshim të rëndësishëm nga programi zgjedhor i laburistëve i vitit 2024, i cili përjashtonte rikthimin në tregun e përbashkët evropian, bashkimin doganor dhe lëvizjen e lirë.
Në konferencën e Partisë Laburiste në shtator, Burnham deklaroi se po shqyrtonte disa alternativa për rinovimin e marrëdhënieve me BE-në, pa dhënë hollësi. Brenda partisë, figura të ndryshme kanë mbështetur afrimin me tregun e përbashkët, bashkimin doganor apo edhe rikthimin e plotë në Union.
Anëtarësimi në tregun e përbashkët do të kërkonte që Londra të pranonte rregullat evropiane për lëvizjen e lirë të njerëzve.
Megjithatë, Burnham përcaktoi dy kufij të qartë në intervistë: monedhën e përbashkët evropiane dhe zonën Schengen.
“Nuk e shoh veten të rekomandoj ndonjëherë diçka që do të përfshinte anëtarësimin në euro apo në Schengen”, deklaroi ai.
Diskutimet zhvillohen përpara samitit të 20 nëntorit, ku Mbretëria e Bashkuar dhe BE-ja synojnë të përmbyllin një paketë marrëveshjesh që përfshin tregtinë dhe rregullat klimatike.
