Zgjedhjet parlamentare në Suedi po shkojnë drejt një rezultati tepër të ngushtë, i cili do të përcaktojë nëse vendi do të drejtohet nga një qeveri e re e qendrës së majtë apo nëse e djathta ekstreme do të hyjë për herë të parë në ekzekutiv.
Pas numërimit të 95 për qind të votave, blloku i udhëhequr nga kryetarja socialdemokrate e opozitës, Magdalena Andersson, kryeson me tre mandate ndaj aleancës së djathtë të kryeministrit konservator Ulf Kristersson.
Projeksionet e Autoritetit Zgjedhor suedez i japin bllokut të Anderssonit 176 nga 349 vendet në Parlament, ndërsa kampi i Kristerssonit parashikohet të sigurojë 173 mandate. Vetëm rreth 28 mijë vota ndajnë dy blloqet, ndërkohë që afro 200 mijë të tjera pritet të numërohen të mërkurën.
Për këtë arsye, rezultati përfundimtar mund të mos bëhet i ditur deri në mesin e javës. Të dy kandidatët për kryeministër pritet të zhvillojnë negociata me drejtuesit e partive të tjera për të siguruar shumicën e nevojshme për formimin e qeverisë.
Sipas zyrtarëve të njohur me zhvillimet, Kristersson pritet të përpiqet të bindë Partinë e Qendrës që të largohet nga kampi i Anderssonit dhe t’i bashkohet aleancës së djathtë. Më pas ai mund të kërkojë një votim në Parlamentin e ri për të qëndruar në detyrën e kryeministrit.
Megjithëse është në avantazh, rezultati përbën një zhgënjim të pjesshëm për Anderssonin. Blloku i saj kishte kryesuar bindshëm në sondazhe për disa muaj, por diferenca u ngushtua ndjeshëm gjatë dy javëve të fundit të fushatës.
“Rezultati është i barabartë, por për momentin jemi në krye. Nëse kjo epërsi ruhet, Suedia do të ketë një qeveri të re”, deklaroi Andersson para mbështetësve të saj.
Zgjedhjet konsiderohen një moment vendimtar për politikën suedeze. Fitorja e Anderssonit do të rikthente qendrën e majtë në pushtet, ndërsa një mandat tjetër për Kristerssonin mund t’u hapte rrugën Demokratëve të Suedisë, një forcë e djathtë radikale kundër emigracionit, të merrnin poste ministrore për herë të parë.
Gjatë katër viteve të fundit, Kristersson ka qeverisur me mbështetjen parlamentare të Demokratëve të Suedisë, por pa i përfshirë ata formalisht në kabinet.
Kryeministri në detyrë pranoi se rezultati i ngushtë do ta bëjë të ndërlikuar formimin e qeverisë, por argumentoi se e majta nuk kishte siguruar një shumicë bindëse për programin e saj ekonomik.
“Se ku do të përfundojë gjithçka, mbetet për t’u parë. Por ne nuk kemi arsye të nxitojmë”, u tha Kristersson mbështetësve të tij në Stokholm.
Një fitore e së djathtës do t’u jepte Demokratëve të Suedisë ndikim më të drejtpërdrejtë në qeverisje. Kristersson ka deklaruar se mund t’u besohet përfaqësuesve të kësaj partie, me të cilën ka bashkëpunuar për miratimin e politikave më të ashpra kundër emigracionit dhe krimit të organizuar.
Ai ka theksuar se çdo ministër i ardhshëm do të emërohet prej tij dhe se në qeveri do të përfshihen vetëm persona me përvojë dhe gjykim të mirë.
Edhe rruga e Anderssonit drejt formimit të kabinetit mbetet e vështirë. Blloku i saj përbëhet nga katër parti, mes të cilave ekzistojnë mosmarrëveshje për disa politika ekonomike dhe sociale. Për shkak të diferencës minimale, partitë e vogla mund të luajnë një rol vendimtar në negociatat e ardhshme.
Rezultati po ndiqet me vëmendje edhe jashtë Suedisë, në një periudhë kur forcat nacionaliste dhe partitë e djathta radikale po forcohen në disa vende europiane.
