Organizata e Veteranëve të Luftës së Ushtrisë Çlirimtare të Kosovës (OVL-UÇK) ka reaguar lidhur me zhvillimet e fundit në protestën disaditore që po mbahet në Tiranë, duke shprehur shqetësimin për atë që e cilëson si përpjekje për manipulim politik dhe instrumentalizim të simboleve të UÇK-së.

Përmes një deklarate publike, kryetari i OVL-UÇK-së, Hysni Gucati, theksoi se është e papranueshme që në emër të Ushtrisë Çlirimtare të Kosovës të flasin apo të paraqiten individë dhe grupe që, sipas tij, ndër vite kanë tentuar të zbehin dhe të devijojnë vlerat e luftës çlirimtare.

Gucati nënvizoi se kauza e UÇK-së nuk mund të shfrytëzohet për qëllime politike apo interesa të ngushta personale dhe partiake.

“OVL e UÇK-së rithekson me përgjegjësi të plotë se kauza e UÇK-së nuk është dhe nuk mund të jetë instrument i asnjë agjende politike të ditës apo i interesave të ngushta personale e partiake”, u shpreh ai.

Në reagimin e saj, Organizata e Veteranëve u bëri thirrje organizatorëve të protestës në Tiranë që të ruajnë integritetin e protestës dhe të mos lejojnë keqpërdorimin e emrit të UÇK-së apo vetëdeklarime të rreme në emër të ish-ushtarëve dhe veteranëve të saj.

Sipas Gucatit, simbolika e UÇK-së përfaqëson sakrificën dhe përpjekjen për liri të popullit shqiptar dhe duhet të trajtohet me dinjitet e respekt.

“OVL e UÇK-së u bën thirrje organizatorëve të protestës në Tiranë që ta garantojnë integritetin e protestës dhe të mos lejojnë asnjë përpjekje për manipulim, keqpërdorim apo vetëdeklarim të rremë në emër të ish-ushtarëve apo veteranëve të UÇK-së. UÇK-ja është pjesë e historisë së lirisë dhe sakrificës së popullit tonë dhe duhet trajtuar me respekt, jo për përfitime politike”, thuhet në deklaratë.

Reagimi i OVL-UÇK-së vjen në një moment kur debati mbi përdorimin e simboleve të luftës së Kosovës në protestat që po zhvillohen në Tiranë është intensifikuar, ndërsa figura të ndryshme publike dhe politike kanë shprehur qëndrime të kundërta mbi këtë çështje.