Presidenti amerikan Donald Trump është përballur me kritika nga ligjvënës demokratë, por edhe nga disa republikanë, për përdorimin e fondeve publike për transmetimin e spoteve televizive që promovojnë presidentin vetëm pak javë përpara zgjedhjeve të mesmandatit të 3 nëntorit. Kritikët ngrenë pikëpyetje nëse fushata shkel kufizimet federale për përdorimin e fondeve qeveritare për propagandë politike.
Polemikat u shtuan pas transmetimit të dielën të një spoti 30-sekondësh gjatë ndeshjeve të futbollit amerikan. Videoja bardhezi tregon Trump duke ecur në një korridor, ndërsa në sfond dëgjohet një fjalim i tij me mesazhe kundër “luftënxitësve”, “globalistëve”, komunistëve dhe marksistëve.
Spotit i është vendosur titulli “The Final Battle” dhe përfundon me shënimin se është “paguar nga qeveria amerikane”. Sipas të dhënave të kompanisë AdImpact të raportuara nga mediat amerikane, vetëm ky spot kishte kushtuar më shumë se 360 mijë dollarë në transmetime deri në fundjavë.
Videoja është pothuajse identike me një material të përdorur nga fushata presidenciale e Trump në vitin 2024. Versioni i financuar nga qeveria nuk përmban pjesën përfundimtare të spotit të atëhershëm, ku shfaqej thirrja për t’iu bashkuar fushatës së Trump.
Ligjvënësit demokratë pretendojnë se përdorimi i parave të taksapaguesve për materiale të tilla mund të përbëjë propagandë të financuar nga qeveria. Demokratët kanë kërkuar shpjegime nga Shtëpia e Bardhë dhe kanë argumentuar se fondet federale nuk duhet të përdoren për të promovuar politikisht presidentin.
Kritikat nuk kanë ardhur vetëm nga demokratët. Senatori republikan John Kennedy ka kundërshtuar gjithashtu përdorimin e parave publike për reklama që promovojnë Trump, duke thënë se qeveria nuk duhet të përdorë fondet e taksapaguesve në këtë mënyrë.
Shtëpia e Bardhë i ka hedhur poshtë pretendimet se bëhet fjalë për reklama elektorale. Administrata i cilëson materialet “njoftime të shërbimit publik” dhe argumenton se ato janë edukative dhe patriotike.
Një zyrtar i Shtëpisë së Bardhë ka argumentuar gjithashtu se Trump nuk është kandidat në zgjedhjet e mesmandatit dhe se spotet nuk përmbajnë një thirrje të drejtpërdrejtë për votë apo veprim elektoral. Administrata ka përmendur edhe raste kur qeveritë e mëparshme kanë financuar fushata publike për tema si Medicare apo vaksinimi kundër COVID-19.
Megjithatë, dallimi mes një njoftimi të ligjshëm qeveritar dhe propagandës së ndaluar është bërë pjesë e debatit. Zyra e Përgjegjshmërisë së Qeverisë amerikane ka konstatuar edhe në administrata të mëparshme shkelje të kufizimeve për propagandën e financuar me para publike, ndërsa deri tani nuk ka një vendim përfundimtar që ta shpallë të paligjshëm spotin aktual të administratës Trump.
Polemika vjen në prag të zgjedhjeve të mesmandatit, të cilat do të përcaktojnë përbërjen e re të Kongresit amerikan.
