Administrata e presidentit amerikan Donald Trump ka lënë jashtë disa aleatë të rëndësishëm nga një takim i planifikuar muajin e ardhshëm në Poloni, ku do të diskutohet për të ardhmen e NATO-s.
Sipas raportimit të POLITICO-s, takimi po organizohet nën drejtimin e Elbridge Colby, zyrtar i lartë për politikat në Pentagon, dhe do të funksionojë si një grup pune për çështjet e ardhshme të Aleancës.
Mes vendeve që nuk kanë marrë ftesë janë Mbretëria e Bashkuar, Franca dhe shtetet baltike, ndonëse ato janë ndër vendet me rol të rëndësishëm në NATO dhe me nivele të larta shpenzimesh për mbrojtjen.
Sipas diplomatëve të cituar në raportim, mungesa e ftesave ka ngritur pikëpyetje mbi kriteret e përdorura nga Uashingtoni dhe mbi qëllimin e këtij formati.
“Ne po bëjmë gjithçka që po na kërkohet. Po përpiqemi të kuptojmë cilat janë kriteret dhe cili është qëllimi i këtyre takimeve”, tha një zyrtar i një vendi aleat që nuk është ftuar.
Vendet e ftuara në këtë format raportohet se janë Norvegjia, Suedia, Finlanda, Polonia, Gjermania dhe Holanda. Colby ka zhvilluar edhe më parë takime të ngjashme me këto vende, në një format të njohur si “Bergen Group”.
Disa diplomatë kanë shprehur shqetësimin se një qasje selektive ndaj aleatëve mund të krijojë ndarje të reja brenda NATO-s, në një kohë kur Aleanca po përballet me tensione të shtuara me Rusinë dhe presione për rritjen e kapaciteteve të mbrojtjes.
Shtëpia e Bardhë nuk ka komentuar raportimin, ndërsa Pentagoni ka refuzuar të japë një qëndrim publik mbi arsyet e përzgjedhjes së vendeve pjesëmarrëse.
Që prej rikthimit në Shtëpinë e Bardhë, Trump ka kritikuar vazhdimisht disa aleatë të NATO-s për nivelin e shpenzimeve të mbrojtjes dhe për qëndrimet e tyre ndaj prioriteteve të politikës së jashtme amerikane.
Raportimi vjen gjithashtu pasi administrata Trump kishte diskutuar më herët mundësinë e diferencimit të aleatëve në bazë të mbështetjes së tyre ndaj prioriteteve amerikane, një qasje që ka shkaktuar shqetësim në disa kryeqytete europiane.
