Trump kërkon nga Xi lirimin e Jimmy Lai, por shprehet pesimist
Presidenti i SHBA-së, Donald Trump, ka bërë të ditur se ka diskutuar me presidentin kinez Xi Jinping mundësinë e lirimit të ish-manjatit të mediave të Hong Kongut, Jimmy Lai, si dhe pastorit Ezra Jin Mingri.
Në një intervistë për Fox News me gazetarin Bret Baier, Trump u shpreh se çështjen e Jimmy Lai e ka ngritur disa herë gjatë bisedimeve me liderin kinez, duke kërkuar një gjest humanitar për lirimin e tij.
Deklarata e Trump:
“Thashë: ‘Do ta vlerësoja nëse do ta lironit. Ai është i moshuar dhe ndoshta nuk është mirë me shëndet. Do të ishte një gjest i mirë’.”
Megjithatë, ai pranoi se përgjigjja nga pala kineze nuk ka qenë inkurajuese, duke theksuar se nuk është optimist për një zhvillim pozitiv në këtë drejtim.
“Nuk ndihesha optimist, duhet të jem i sinqertë”, tha Trump, duke shtuar se e ka ngritur këtë çështje të paktën dy herë gjatë bisedimeve me Xi Jinping.
Jimmy Lai, 78 vjeç, është dënuar me 20 vite burg për shkelje të ligjit të sigurisë kombëtare dhe për nxitje të kryengritjes në Hong Kong. Rasti i tij është ndjekur nga organizata ndërkombëtare të të drejtave të njeriut dhe nga liderë perëndimorë, të cilët e konsiderojnë atë një figurë kyçe të lëvizjes pro-demokraci.
Sa i përket pastorit Ezra Jin Mingri, Trump u shfaq më optimist për mundësinë e lirimit të tij, megjithëse nuk dha detaje të mëtejshme.
