BE dënon kërcënimin e Trump për tarifa 100% ndaj vendeve që taksojnë shërbimet digjitale
Komisioni Evropian ka reaguar ndaj paralajmërimit të presidentit amerikan Donald Trump për vendosjen e tarifave deri në 100% ndaj importeve nga vendet që miratojnë taksa të reja për shërbimet digjitale të kompanive amerikane të teknologjisë, duke e cilësuar një masë të tillë të pajustifikuar.
Në një deklaratë zyrtare, një zëdhënës i Komisionit Evropian theksoi se Bashkimi Evropian dhe shtetet anëtare kanë të drejtën sovrane të rregullojnë aktivitetet ekonomike në territorin e tyre, në përputhje me vlerat demokratike dhe angazhimet ndërkombëtare.
“Çdo masë e njëanshme që synon të ndëshkojë politika të tilla legjitime është e pajustifikuar”, deklaroi zëdhënësi, duke shtuar se Brukseli do të reagojë me shpejtësi dhe vendosmëri nëse kërcënimet e Uashingtonit zbatohen.
Sipas Komisionit Evropian, Bashkimi Evropian do të mbrojë të drejtat dhe autonominë e tij rregullatore përballë çdo mase tregtare që cenon kompetencat e shteteve anëtare.
Reagimi vjen pasi presidenti Donald Trump paralajmëroi se çdo vend që vendos taksa mbi shërbimet digjitale të gjigantëve amerikanë të teknologjisë do të përballet me tarifa 100% për të gjitha mallrat që eksporton në Shtetet e Bashkuara.
Në një postim në platformën e tij Truth Social, Trump deklaroi se këto tarifa do të zëvendësonin çdo marrëveshje ekzistuese tregtare me vendet përkatëse, pavarësisht nëse ato janë në fuqi apo jo.
Bashkimi Evropian dhe Shtetet e Bashkuara arritën vitin e kaluar një marrëveshje për t’i dhënë fund mosmarrëveshjeve tregtare mbi tarifat, megjithatë zbatimi i plotë i saj nga ana e BE-së u shty. Në muajin maj, shtetet anëtare dhe Parlamenti Evropian miratuan gjithashtu dispozita mbrojtëse për t’u përballur me mosmarrëveshje të mundshme tregtare.
Polemika e fundit rrezikon të shtojë tensionet në marrëdhëniet ekonomike transatlantike, në një kohë kur të dyja palët po përballen me sfida të reja në tregtinë globale dhe rregullimin e ekonomisë digjitale.
