SHBA zbut kufizimet ndaj Anthropic, lejon përdorimin e Claude Mythos 5 në mbi 100 institucione
Administrata amerikane ka lejuar kompaninë Anthropic të shpërndajë modelin e saj të inteligjencës artificiale Claude Mythos 5 në më shumë se 100 institucione amerikane, përfshirë korporata të mëdha dhe agjenci federale. Lajmi u raportua nga portali i specializuar Semafor.
Vendimi, i komunikuar përmes një letre zyrtare të dërguar të premten nga Departamenti amerikan i Tregtisë, shënon një zbutje të ndjeshme të tensioneve mes administratës së presidentit Donald Trump dhe një prej kompanive më të rëndësishme në fushën e inteligjencës artificiale.
Vetëm dy javë më parë, administrata kishte vendosur kontrolle eksporti ndaj modelit Claude Mythos 5, duke pezulluar përdorimin e tij, si edhe të modelit tjetër Fable 5, i cili sipas raportimeve pritet të autorizohet sërish së shpejti.
“Kam përcaktuar se ekzistojnë masat e duhura të sigurisë për t’u lejuar partnerëve të caktuar të besueshëm qasje në modelin Claude Mythos 5”, shkroi sekretari amerikan i Tregtisë, Howard Lutnick, në një letër drejtuar drejtorit kryesor të informatikës së Anthropic, Tom Brown.
Sipas Lutnick, vendimi u mor pas “përparimit të rëndësishëm” në diskutimet mes qeverisë amerikane dhe kompanisë që nga vendosja e kufizimeve.
“Anthropic është angazhuar të bashkëpunojë me qeverinë amerikane për protokollet, standardet dhe publikimin e modeleve të saj”, theksoi ai.
Vendimi vjen në të njëjtën ditë kur OpenAI, rivali kryesor i Anthropic, u dërgoi modelin e saj më të ri GPT-5.6 një grupi të kufizuar partnerësh të miratuar nga administrata amerikane, duke reflektuar konkurrencën në rritje mes kompanive kryesore të inteligjencës artificiale dhe rëndësinë që Uashingtoni po i kushton kontrollit të teknologjive të avancuara.
