Qeveria franceze nuk ka arritur t’i bindë nxënësit dhe studentët të ndërpresin protestat, pavarësisht propozimeve për shtimin e vendeve në arsimin e lartë, rinovimin e shkollave dhe ndryshimin e sistemit të pranimit në universitete.
Pas takimeve të së hënës me kryeministrin Sébastien Lecornu dhe ministrat Édouard Geffray e Philippe Baptiste, përfaqësuesit e organizatave studentore thanë se masat nuk u përgjigjen kërkesave të tyre.
“Jo të gjitha kërkesat tona janë përmbushur dhe ne do ta çojmë këtë deri në fund”, deklaroi Louis Letoublon, zëvendëspresident i organizatës “Les Lycéens!”.
Ai u bëri thirrje nxënësve të shkollave të mesme të vijojnë protestat më 31 tetor dhe 5 nëntor.
Nxënësit dhe studentët kërkojnë deri në 250 mijë vende shtesë në arsimin e lartë, kushte më të mira në institucionet arsimore, më shumë mësues dhe një reformim të thellë të procedurave të pranimit në universitete.
Në takimet e së hënës, qeveria propozoi 15 mijë vende të reja në arsimin e lartë, në fushat e industrisë, shëndetësisë dhe formimit teknik. Ajo premtoi gjithashtu më shumë fonde për rinovimin e shkollave dhe kufizimin në 28 të numrit të nxënësve për klasë në vitin e parë të shkollës së mesme.
Për platformën e pranimit në universitete, Parcoursup, qeveria tha se do të shqyrtojë një reformë duke nisur nga viti 2028. Organizatat studentore e konsiderojnë sistemin jotransparent dhe burim pabarazie.
Masat u raportuan gjerësisht nga mediat franceze dhe u konfirmuan nga përfaqësuesit pjesëmarrës në takime. Megjithatë, sindikata studentore UNEF i cilësoi ato të pamjaftueshme dhe paralajmëroi vazhdimin e mobilizimit në rrugë dhe kampuse.
“Edhe një herë, qeveria nuk po e kupton thelbin. Nëse strategjia e saj është të shpërfillë kërkesat tona, atëherë do të qëndrojmë të mobilizuar në rrugë dhe në kampuset universitare dhe nuk do të tërhiqemi”, deklaroi UNEF.
Demonstratat dhe bllokimet në shkolla e universitete ishin ndër shfaqjet e para të pakënaqësisë sociale gjatë këtij muaji. Mobilizimi u zgjerua më pas me protestat për koston e jetesës, të cilat dy javë më parë u shoqëruan edhe me trazira.
