Mundësia që Shtetet e Bashkuara të kufizojnë përkohësisht eksportet e karburantit dizel ka ngritur shqetësime në Europë, në një kohë kur kontinenti është bërë gjithnjë e më i varur nga furnizimet amerikane.
Sipas raportimeve të POLITICO, administrata amerikane ka diskutuar mundësinë e një ndalimi 90-ditor të eksporteve të dizelit, me synimin për të rritur furnizimin në tregun vendas dhe për të frenuar çmimet e larta.
Shtëpia e Bardhë, megjithatë, ka mohuar se një masë e tillë po përgatitet. Edhe Sekretari amerikan i Energjisë, Chris Wright, është shprehur kundër një ndalimi të plotë, duke argumentuar se masa mund të detyrojë rafineritë amerikane të ulin prodhimin dhe, si pasojë, të rrisë çmimet e benzinës dhe karburantit të avionëve.
Por vetëm mundësia e kufizimeve ka ngritur shqetësime në Europë. Muajin e kaluar, SHBA furnizoi vendet e Bashkimit Europian dhe Mbretërinë e Bashkuar me rreth 420 mijë fuçi dizel, më shumë se gjysma e importeve të tyre për atë muaj.
Varësia nga furnizimet amerikane është rritur pas problemeve me dërgesat nga Lindja e Mesme, ndërsa luftërat në Iran dhe Ukrainë kanë goditur tregun global të karburanteve dhe kanë çuar çmimet e dizelit në nivele rekord.
Përfaqësues të industrisë paralajmërojnë se rezervat europiane të dizelit janë nën presion dhe se alternativat për të zëvendësuar shpejt furnizimet amerikane janë të kufizuara. Një ndërprerje e eksporteve nga SHBA, sipas tyre, mund të kishte pasoja serioze për transportin e rëndë dhe industrinë europiane.
Megjithatë, zyrtarët europianë kanë tentuar të ulin shqetësimet. Ministri çek i Tregtisë, Karel Havlíček, tha se nuk pret që ndalimi të materializohet, ndërsa qeveritë e Gjermanisë dhe Mbretërisë së Bashkuar kanë theksuar se po punojnë për të garantuar sigurinë e furnizimit.
Britania ishte importuesi më i madh europian i dizelit amerikan muajin e kaluar, me rreth 108 mijë fuçi, ndërsa Franca importoi rreth 42 mijë dhe Gjermania 30 mijë fuçi.
Situata mbetet e ndjeshme pasi Europa është detyruar të diversifikojë furnizimet fillimisht larg Rusisë dhe, së fundmi, edhe nga disa prodhues të Lindjes së Mesme. Çmimet globale të dizelit kanë arritur nivele rekord, ndërsa kapacitetet e rafinimit në shumë vende janë pranë kufijve maksimalë.
