Shtetet e Bashkuara kanë konfirmuar për herë të parë publikisht se kanë vendosur armë hapësinore në orbitën e Tokës.
Sekretari amerikan i Forcave Ajrore, Troy Meink, deklaroi se këto kapacitete janë të nevojshme për mbrojtjen e forcave amerikane nga veprimet armiqësore. Ai nuk dha hollësi për llojin dhe aftësitë e armëve apo për kohën kur ato janë vendosur në orbitë.
Një zëdhënës i Forcave Hapësinore të SHBA-së tha se Uashingtoni zotëron kapacitete që mund të përdoren për qëllime mbrojtëse dhe sulmuese, për të ndërprerë apo dobësuar sistemet hapësinore të kundërshtarëve.
Zhvillimi vjen në një kohë kur SHBA-ja, Rusia dhe Kina po rrisin kapacitetet e tyre ushtarake në hapësirë. Satelitët luajnë një rol thelbësor në komunikimet, navigimin dhe mbikëqyrjen ushtarake.
Traktati ndërkombëtar i vitit 1967 ndalon vendosjen në orbitë të armëve të shkatërrimit në masë, por jo të çdo lloji arme hapësinore.
