Pentagoni ka pranuar se lufta me Iranin ka shkaktuar mungesa në rezervat amerikane të municioneve, duke shtuar shqetësimet për kapacitetin e SHBA-së për të përballuar konflikte të zgjatura.
Sipas një raporti të Inspektorit të Përgjithshëm të Departamentit të Mbrojtjes, të paraqitur në Kongres, operacioni ushtarak “Epic Fury” ka kushtuar rreth 33.4 miliardë dollarë nga 28 shkurti deri më 30 qershor.
Rreth 22.3 miliardë dollarë nga kjo shumë janë shpenzuar vetëm për municionet e përdorura gjatë operacionit.
Raporti bie në kontrast me deklaratat e mëparshme të administratës Trump, e cila kishte hedhur poshtë shqetësimet për gjendjen e arsenaleve amerikane. Presidenti Donald Trump ka deklaruar se vendi po prodhon më shumë armë të teknologjisë së lartë se në çdo periudhë tjetër.
Ndërkohë, konflikti ka ndikuar edhe në tregjet ndërkombëtare të energjisë, me çmimin e naftës që ka kaluar nivelin e 103 dollarëve për fuçi.
