Ushtria amerikane ka kryer sulme të kufizuara ndaj objektivave në ishullin iranian të Keshmit, pasi forcat iraniane qëlluan drejt një avioni amerikan, sipas tre zyrtarëve amerikanë të cituar nga CNN.
Burimet, të cilat folën në kushte anonimiteti, thanë se goditjet u ndërmorën të hënën për mbrojtjen e forcave dhe mjeteve amerikane në rajon.
Njëri prej zyrtarëve theksoi se operacioni nuk ishte pjesë e një fushate të gjerë ushtarake kundër Iranit, por një përgjigje ndaj përdorimit të raketave tokë-ajër nga forcat iraniane.
“Ky ishte një veprim mbrojtës, pasi iranianët përdorën raketa tokë-ajër kundër aseteve amerikane”, deklaroi një zyrtar për CNN.
Sipas një personi të njohur me çështjen, administrata amerikane zgjodhi të mos e njoftonte menjëherë operacionin, për të shmangur perceptimin se bëhej fjalë për një ndërhyrje më të gjerë.
Shpërthime pranë Ngushticës së Hormuzit
Agjencia iraniane Fars raportoi se shpërthime u dëgjuan në Keshm në orët e para të së martës, sipas orës lokale. Ato u dëgjuan edhe nga banorë të ishullit Hengam dhe qytetit portual Bandar Abbas.
Të hënën në mbrëmje, Garda Revolucionare iraniane pretendoi se kishte rrëzuar dy dronë amerikanë zbulimi mbi Keshm. Nuk është konfirmuar nëse ky pretendim lidhet drejtpërdrejt me goditjet amerikane, ndërsa, sipas raportimeve, pala amerikane e ka kundërshtuar rrëzimin e dronëve.
Ishulli i Keshmit, rreth 22 kilometra larg Bandar Abbasit, ka rëndësi strategjike për pozicionin pranë Ngushticës së Hormuzit. Përpara luftës, në këtë korridor kalonin rreth 20 milionë fuçi naftë në ditë.
Goditjet vijnë mes sinjaleve për marrëveshje
Përplasja e fundit ndodh ndërsa Uashingtoni dhe Teherani kanë dhënë sinjale për përparim në negociata.
Presidenti Donald Trump deklaroi të hënën në rrjetet sociale se një marrëveshje me Iranin “mund të arrihet”. Ministri i Jashtëm iranian, ndërkohë, bëri të ditur se Teherani po ofron rihapjen e Ngushticës së Hormuzit brenda dy ditësh, nëse arrihet një marrëveshje.
Edhe zëvendëspresidenti amerikan JD Vance tha se bisedimet kanë shënuar përparim. Ai deklaroi se kishte diskutuar me Trumpin dhe se të dy ishin optimistë për mundësinë e një marrëveshjeje, duke theksuar se opsionet ushtarake mbeten në dispozicion.
Trump përmend goditjen e një objekti bërthamor
Në një intervistë për Fox News, Trump nuk komentoi drejtpërdrejt raportimet për sulmet në Keshm, por la të hapur mundësinë e goditjes së objektit nëntokësor bërthamor të njohur si “Mali Pickaxe”.
Sipas dyshimeve izraelite, objekti mund të strehojë një pjesë të uraniumit të pasuruar të Iranit dhe pajisje të avancuara për pasurimin e tij.
“Mund ta bëjmë fjalë për fjalë brenda një ore, sa herë që të dëshirojmë”, u shpreh presidenti amerikan.
Teherani paralajmëron kundërpërgjigje
Kryetari i Parlamentit iranian, Mohammad Bagher Ghalibaf, i cili po drejton negociatat me SHBA-në, deklaroi në orët e para të së martës se Irani nuk do t’u nënshtrohet kërcënimeve dhe veprimeve ushtarake.
Ai paralajmëroi se përgjigjja ushtarake dhe strategjike ndaj çdo veprimi të kundërshtarit do të jetë e paparashikueshme.
Më herët, udhëheqësi suprem Mojtaba Khamenei kishte paralajmëruar një kundërpërgjigje “pa kufizime gjeografike” ndaj çdo sulmi të madh të ri. Një zyrtar i lartë iranian i sigurisë i tha gjithashtu CNN-së se objektivat e mundshëm mund të përfshijnë infrastrukturë përtej sektorit të naftës, përfshirë atë të inteligjencës artificiale.
Raportimet për goditjet në Keshm u pasqyruan në tregjet e energjisë, ku çmimet e naftës u rritën në orët e para të tregtimit në Azi, pas rënies së mëparshme të nxitur nga pritshmëritë për negociata.
