Projektbuxheti i arsimit për vitin 2027 parashikon kalimin nga një mësues ndihmës për katër nxënës me aftësi të kufizuara në një mësues për çdo fëmijë, deklaroi ministrja Mirela Kumbaro.
Gjatë prezantimit në Komisionin për Edukimin, Shkencën dhe Sportet, ajo tha se të pesta programet buxhetore të arsimit do të kenë rritje financimi. Për arsimin parauniversitar parashikohen mbi 1 miliard lekë më shumë se në vitin 2026.
Mbështetje individuale për nxënësit
Kumbaro e cilësoi shtimin e mësuesve ndihmës si një nga nismat kryesore për gjithëpërfshirjen në arsim.
“E kemi pasur këtë raport një mësues ndihmës për katër fëmijë, ndërsa në vitin 2027 e çojmë një mësues për një fëmijë”, u shpreh ministrja.
Sipas saj, këtë vit shkollor në sistemin parauniversitar janë përfshirë 6.039 fëmijë me aftësi të kufizuara, krahasuar me rreth 4 mijë në vitin shkollor 2024–2025.
Kumbaro sqaroi se shtimi i numrit lidhet edhe me zgjerimin e grupmoshave që përfitojnë mbështetje. Trajtimi përfshin moshat nga 3 deri në 19 vjeç dhe, për një kategori, deri në 21 vjeç.
500 milionë lekë për programin “Pas shkolle”
Projektbuxheti parashikon 500 milionë lekë për zgjerimin e programit “Pas shkolle” dhe mbështetjen e mësuesve të angazhuar në të.
Sipas ministres, programi do të zgjatet me dy orë në ditë, duke mundësuar qëndrimin e fëmijëve në shkollë maksimalisht deri në orën 17:00. Krahas orarit të zgjeruar, do të ofrohen edhe module të reja.
Investime në shkolla dhe kopshte
Për periudhën 2027–2029, Ministria e Arsimit planifikon rreth 120 projekte për ndërtimin dhe rikonstruksionin e objekteve arsimore, me një vlerë prej rreth 88 milionë eurosh.
Vetëm gjatë vitit 2027 do të vijojë financimi i 54 projekteve: 40 shkolla e kopshte në arsimin bazë dhe 14 shkolla të mesme. Për këto projekte parashikohen rreth 2,2 miliardë lekë.
Një fond tjetër prej rreth 700 milionë lekësh synon të hapë rrugën për rreth 40 projekte të reja. Thirrja për to është shpallur gjatë vitit 2026, me qëllim që të jenë gati për financim në fillim të vitit të ardhshëm buxhetor.
Kumbaro tha gjithashtu se çdo vit trajnohen 20 mijë deri në 22 mijë mësues përmes Programit Kombëtar të Zhvillimit të Mësuesve. Trajnimet zhvillohen në partneritet me nëntë universitete publike dhe përqendrohen te shkencat, gjuhët dhe aftësitë digjitale, ndërsa vijon edhe përditësimi i kurrikulave.
