Sekretari amerikan i Shtetit, Marco Rubio, deklaroi të martën se një takim mes presidentit Donald Trump dhe udhëheqësve të Rusisë e Kinës do të ishte “një gjë shumë pozitive për botën”, veçanërisht për diskutimet mbi kontrollin e armëve bërthamore.
Duke folur me gazetarët në Indi, Rubio tha se ekziston mundësia për bisedime në nivelin më të lartë mes Uashingtonit, Moskës dhe Pekinit, ndërsa kujtoi gatishmërinë e shprehur nga Trump për një samit të tillë.
“Mendoj se ekziston një mundësi […] që Shtetet e Bashkuara, Rusia dhe Kina, në nivel udhëheqësish, të zhvillojnë një bisedë për çështje të tilla si kontrolli i armëve”, u shpreh ai.
Rubio kundërshtoi idenë se dialogu me vende rivale duhet të konsiderohet shpërblim apo lëshim politik. Sipas tij, komunikimi me palën kundërshtare është thelbi i diplomacisë dhe negociatave.
Ai pranoi se një takim i vetëm nuk do të zgjidhte mosmarrëveshjet e kahershme mes tri vendeve, por argumentoi se mbajtja hapur e kanaleve të komunikimit ul rreziqet për sigurinë ndërkombëtare.
“Mendoj se bota është një vend më i sigurt kur udhëheqësit e arsenaleve më të fuqishme bërthamore në botë të paktën komunikojnë me njëri-tjetrin”, deklaroi sekretari amerikan.
Duke iu referuar Kinës, Rubio tha se Pekini historikisht i ka shmangur diskutimet për kontrollin e armëve bërthamore, duke e lidhur qëndrimin e tij me synimin për të arritur një arsenal të krahasueshëm me fuqitë e tjera të mëdha.
Megjithatë, ai e vlerësoi si pozitive përpjekjen për hapjen e një dialogu trepalësh mbi kontrollin e armatimeve dhe reduktimin e rrezikut bërthamor.
