Përfaqësues të lartë të kandidatëve të qendrës politike franceze pritet të takohen këtë të mërkurë në Paris, në përpjekje për të gjetur një rrugë të përbashkët për zgjedhjet presidenciale të pranverës së vitit 2027, por perspektiva për një kompromis mes kampeve rivale mbetet e largët.
Në qendër të përplasjes janë dy ish-kryeministrat e Emmanuel Macron, Gabriel Attal dhe Edouard Philippe, të cilët synojnë kryesisht të njëjtin elektorat. Mbështetësit e tyre po shqetësohen se rivaliteti i zgjatur mund të dobësojë aq shumë qendrën politike, sa gara presidenciale të dominohet nga Marine Le Pen në të djathtën ekstreme dhe Jean-Luc Mélenchon në të majtën radikale.
Sipas POLITICO, shqetësimi brenda kampit centrist është se mungesa e një kandidati të vetëm dhe konkurrues mund ta kthejë raundin e dytë në një përballje mes Le Pen dhe Mélenchon, të cilët përshkruhen si euroskeptikë dhe kritikë të NATO-s, ndërsa politikat e tyre ekonomike shihen me shqetësim nga tregjet financiare.
Sistemi presidencial francez parashikon një raund të dytë nëse asnjë kandidat nuk siguron më shumë se 50% të votave në të parin. Bazuar në sondazhet aktuale, Le Pen konsiderohet pothuajse e sigurt për një vend në balotazh, ndërsa fillimi i fortë i fushatës së Mélenchon ka shtuar mundësinë që ai të kalojë Philippe dhe të sigurojë vendin tjetër.
Megjithatë, pavarësisht presionit për të gjetur një kandidat të fortë kundër Le Pen, rivaliteti mes centristëve vazhdon. Attal, i cili aktualisht renditet pas Philippe në sondazhe, ditët e fundit është përpjekur ta paraqesë ish-kryeministrin si një politikan të shkëputur nga shqetësimet e qytetarëve.
Philippe është kundërpërgjigjur duke argumentuar se kandidatët që ndajnë të njëjtën hapësirë politike duhet t’i drejtojnë sulmet e tyre kundër ekstremeve dhe jo kundër njëri-tjetrit.
Drejtori i fushatës së Attal, Franck Riester, tha se nuk pret një zgjidhje të përplasjes përpara shkurtit. Edhe Philippe deklaroi se nuk beson se një kandidat i vetëm i qendrës do të dalë përpara vitit të ardhshëm.
Takimi i së mërkurës, pjesë e një serie bisedimesh mes përfaqësuesve të qendrës, pritet të shërbejë kryesisht për të diskutuar mosmarrëveshjet dhe për të shmangur një luftë politike që mund të shkaktojë dëme të pariparueshme.
“Do të vazhdojmë të diskutojmë për fushatën, mënyrat për të shmangur dëmtimin e pariparueshëm të njëri-tjetrit dhe për të rënë dakord mbi një kod sjelljeje”, tha Riester.
Takimet nisën të organizoheshin nga Attal dhe këshilltarët e tij që në pranverë, pasi Philippe kishte shpallur kandidaturën, me synimin për të ruajtur unitetin e bllokut centrist. Megjithatë, përpjekjet janë shoqëruar vazhdimisht nga mosmarrëveshje mbi mënyrën se si duhet zgjedhur një kandidat i vetëm.
Edhe brenda partisë Horizons të Philippe ka pak optimizëm për një marrëveshje të shpejtë. Një deputet i partisë, i cituar në kushte anonimiteti, tha se përfaqësuesit do të marrin pjesë në takim, por nuk kanë besuar ndonjëherë se kjo nismë do të prodhojë një zgjidhje.
Philippe propozoi ndërkohë që kandidatët me qëndrime të ngjashme të zhvillojnë një tjetër takim në fillim të nëntorit për të përcaktuar rrugën përpara. Attal reagoi duke e akuzuar se po kopjon një nismë që ai e ka ndërmarrë tashmë, ndërsa Bruno Retailleau, kandidati dhe drejtuesi i konservatorëve Les Républicains, deklaroi se nuk do të marrë pjesë në një takim të “makronistëve”.
Sondazhet e vendosin Philippe mes kandidatëve më të pozicionuar për të sfiduar seriozisht Le Pen. Por numri i madh i kandidatëve që konkurrojnë për votat e qendrës po u krijon më shumë hapësirë Le Pen dhe Mélenchon për të dominuar debatin politik, nga çështjet e emigracionit dhe propozimet për ndalimin e hixhabit deri te politikat ekonomike dhe borxhi publik.
Një ish-ministër centrist paralajmëroi se konkurrenca mes Attal dhe Philippe, të cilët ideologjikisht janë më pranë njëri-tjetrit, mund të përfundojë duke shkatërruar një bllok politik që tashmë përballet me pakënaqësinë e votuesve ndaj presidencës së Macron.
“Rreziku është që fituesi të përfundojë duke sunduar mbi një shkretëtirë”, tha ish-ministri.
Përballë vështirësive për një marrëveshje me Attal, një pjesë e mbështetësve të Philippe po shohin si alternativë një aleancë me Les Républicains, partia ku ai bënte pjesë më parë. Megjithatë, edhe ky skenar duket i vështirë, pasi Retailleau, i cili aktualisht renditet pas Attal dhe Philippe në sondazhe, ka deklaruar se do ta vazhdojë fushatën “deri në fitore”.
