Protesta e studentëve dhe qytetarëve kundër qeverisë vijon këtë të premte në ditën e 18-të, ndërsa palët mbeten në qëndrimet e tyre: kryeministri Edi Rama kërkon dialog, kurse protestuesit këmbëngulin për dorëheqjen e tij.
Edhe sot, Rama publikoi në rrjetet sociale pamje të karrigeve të vendosura përpara Kryeministrisë, duke përsëritur ftesën për bisedime mbi kërkesat e studentëve.
Protestuesit nuk e kanë pranuar deri më tani ftesën. Lëvizja, e nisur me kërkesa për arsimin dhe kushtet e studentëve, është zgjeruar me pjesëmarrjen e qytetarëve dhe kërkesa që lidhen me qeverisjen.
Kryeministri e ka përjashtuar dorëheqjen, duke iu referuar mandatit të marrë përmes zgjedhjeve.
Gjatë ditëve të fundit, tubimet në Tiranë janë shoqëruar edhe me episode tensioni dhe përplasje mes policisë e protestuesve.
Ndërkohë, për të shtunën është bërë thirrje për një tjetër protestë kundër qeverisë.
