Pekin–Teheran në fokus: Kina i bën thirrje për negociata, Irani falënderon mbështetjen kundër SHBA
Ministri i Jashtëm iranian, Abbas Araghchi, ka zhvilluar bisedime në Pekin me homologun e tij kinez Wang Yi, në një moment tensionesh të larta mes Iranit dhe Shteteve të Bashkuara.
Sipas mediave shtetërore kineze dhe iraniane, takimi u fokusua në situatën e sigurisë në rajon dhe në rritjen e bashkëpunimit dypalësh mes Teheranit dhe Pekinit. Araghchi e falënderoi Kinën për qëndrimin e saj kundër veprimeve ushtarake të SHBA-së dhe Izraelit ndaj Iranit, duke e cilësuar Pekinin si një “mik të ngushtë” të vendit të tij.
Ai theksoi se marrëdhëniet mes dy vendeve po forcohen në kushtet aktuale të tensionuara ndërkombëtare.
Nga ana e tij, Wang Yi bëri thirrje për uljen e përshkallëzimit dhe rikthimin në dialog. “Luftimet duhet të ndalen, armiqësitë nuk duhet të rifillojnë dhe negociatat janë veçanërisht të rëndësishme”, deklaroi ai sipas Ministrisë së Jashtme kineze.
Pekini rikonfirmoi mbështetjen për sovranitetin dhe sigurinë e Iranit, duke vlerësuar gatishmërinë e Teheranit për zgjidhje politike të krizave. Wang Yi nënvizoi gjithashtu rëndësinë e rifillimit të lundrimit të sigurt në Ngushticën e Hormuzit, duke bërë thirrje për përgjegjësi nga të gjitha palët.
Bisedimet u mbajtën në një moment të ndjeshëm diplomatik, pak ditë përpara një vizite të planifikuar të Presidentit amerikan Donald Trump në Kinë, e cila ende nuk është konfirmuar zyrtarisht nga Pekini.
Kina mbetet partneri më i madh tregtar i Iranit dhe një nga blerësit kryesorë të naftës iraniane, ndërsa ka kritikuar vazhdimisht politikat e SHBA-së ndaj Teheranit.
