Ministria e Bujqësisë dhe Zhvillimit Rural ka bërë të ditur se ligji i ri “Për shëndetin e bimëve” synon forcimin e sistemit të mbrojtjes fitosanitare në vend dhe përafrimin e mëtejshëm të legjislacionit shqiptar me standardet e Bashkimi Evropian.
Sipas ministrisë, ligji krijon një kuadër modern për mbrojtjen e shëndetit të bimëve, duke përcaktuar rregulla të qarta për identifikimin, vlerësimin dhe menaxhimin e rreziqeve fitosanitare që lidhen me dëmtuesit e bimëve dhe produkteve bimore.
Kuadri i ri ligjor parashikon masa konkrete për parandalimin e hyrjes dhe përhapjes së dëmtuesve në territorin e Shqipërisë, reduktimin e rreziqeve fitosanitare dhe mbrojtjen e prodhimit bujqësor, biodiversitetit dhe mjedisit.
Po ashtu, ligji synon të garantojë shëndetin e bimëve dhe produkteve bimore në përputhje me standardet bashkëkohore, duke krijuar kushte më të sigurta për zhvillimin e sektorit bujqësor dhe për tregtimin e produkteve shqiptare në tregje më të gjera.
Një nga risitë e aktit është zgjerimi i fushës së monitorimit dhe mbrojtjes edhe për bimët joparazitare që mund të paraqesin rrezik fitosanitar me ndikim ekonomik, social apo mjedisor.
Sipas Ministrisë së Bujqësisë dhe Zhvillimit Rural, miratimi i këtij ligji përbën një hap të rëndësishëm në procesin e harmonizimit të legjislacionit shqiptar me atë evropian, duke kontribuar në zhvillimin e qëndrueshëm të bujqësisë, rritjen e sigurisë ushqimore dhe forcimin e kapaciteteve për menaxhimin e rreziqeve fitosanitare.
Autoritetet vlerësojnë se zbatimi i ligjit do të ndikojë pozitivisht në mbrojtjen e kulturave bujqësore, rritjen e cilësisë së prodhimit vendas dhe përmirësimin e standardeve të kontrollit fitosanitar në të gjithë vendin.
