Shefat e Shtabit të Përbashkët të Forcave të Armatosura të Iranit kanë njoftuar mbylljen e Ngushticës së Hormuzit, duke e lidhur këtë vendim me atë që e cilësojnë si shkelje të armëpushimit nga Shtetet e Bashkuara dhe Izraeli.

Sipas agjencisë iraniane të lajmeve Mehr, autoritetet ushtarake iraniane deklaruan se mbyllja e një prej rrugëve detare më të rëndësishme në botë për transportin e naftës përbën “hapin e parë” të përgjigjes së Teheranit.

“Ky është hapi i parë dhe do të pasohet nga masa të tjera nëse agresioni vazhdon”, thuhet në deklaratën e cituar nga mediat iraniane.

Ngushtica e Hormuzit konsiderohet një korridor strategjik për tregtinë globale të energjisë, pasi përmes saj kalon një pjesë e konsiderueshme e eksporteve botërore të naftës dhe gazit natyror. Çdo kufizim i lëvizjes në këtë zonë pritet të ketë ndikim të menjëhershëm në tregjet ndërkombëtare dhe çmimet e energjisë.

Megjithatë, deri tani nuk ka një konfirmim të pavarur se trafiku detar është ndalur plotësisht. Zyrtarë amerikanë kanë deklaruar se nuk disponojnë prova që tregojnë se Ngushtica e Hormuzit është mbyllur efektivisht për qarkullimin e anijeve.

Deri në këto momente nuk ka pasur reagime zyrtare nga Shtetet e Bashkuara apo Izraeli lidhur me deklaratat e autoriteteve iraniane. Situata mbetet në zhvillim dhe po ndiqet me vëmendje nga tregjet dhe diplomacia ndërkombëtare.