Gjykata Supreme bllokon Trumpin, shtetësia sipas lindjes mbetet në fuqi
Një nga nismat kryesore të presidentit amerikan Donald Trump në fillim të mandatit të tij të dytë, për t’i dhënë fund shtetësisë automatike për fëmijët e lindur në territorin e Shteteve të Bashkuara, është bllokuar nga Gjykata Supreme.
Administrata Trump synonte të ndryshonte interpretimin e Amendamentit të 14-të të Kushtetutës, por vendimi i Gjykatës Supreme ruajti në fuqi parimin e shtetësisë sipas lindjes.
Vendimi u përshëndet nga Unioni Amerikan për Liritë Civile (ACLU), i cili e cilësoi atë si një riafirmim të një prej parimeve themelore të shtetit amerikan.
“Pavarësisht se kush janë prindërit tuaj, nëse lindni në SHBA, ju i përkisni këtij vendi”, thuhet në reagimin e ACLU-së.
Trump e ka kritikuar prej vitesh shtetësinë sipas lindjes, duke e quajtur atë “një turp”, ndërsa zëvendëspresidenti JD Vance e ka përshkruar si “politikën më të gabuar të emigracionit në botë”.
Megjithëse vendimi i Gjykatës Supreme ruan statusin aktual ligjor, ekspertët paralajmërojnë se debati i hapur mbi këtë çështje ka krijuar pasiguri te shumë qytetarë.
Kim Lane Scheppele, profesoreshë e Sociologjisë dhe Çështjeve Ndërkombëtare në Universitetin Princeton, tha se vetëm fakti që kjo e drejtë është vënë në diskutim ka bërë që edhe persona që kanë jetuar gjithë jetën në SHBA të ndihen më të pasigurt për statusin e tyre.
Sipas saj, administrata Trump ka shtuar verifikimet e shtetësisë dhe ka krijuar pranë Departamentit të Drejtësisë një zyrë të posaçme për rastet e denatyralizimit.
Trump e ka paraqitur heqjen e shtetësisë sipas lindjes si një nga shtyllat kryesore të politikës së tij të emigracionit, duke argumentuar se kjo praktikë nxit emigracionin e paligjshëm.
Vendimi i Gjykatës Supreme përbën një pengesë për një nga premtimet kryesore të administratës së tij në fushën e emigracionit. Megjithatë, analistët vlerësojnë se kjo nuk pritet të ndryshojë kursin e politikës “America First”, pasi Trump ka sinjalizuar se do të vijojë me masa të ashpra kundër emigracionit të paligjshëm dhe me kufizimin e hyrjes së refugjatëve në Shtetet e Bashkuara.
