Qeveritë e eurozonës kanë afat deri më 6 nëntor për të propozuar kandidatët për presidentin e ardhshëm të Bankës Qendrore Europiane, pas njoftimit të Christine Lagarde se do të largohet nga detyra më 7 shkurt 2027.
Një zëdhënës i Eurogrupit konfirmoi të martën se Këshilli i Bashkimit Europian ka nisur procedurën për emërimin e pasuesit. Presidenti i Eurogrupit, Kyriakos Pierrakakis, u ka kërkuar vendeve anëtare t’i dorëzojnë propozimet deri të premten.
Sipas POLITICO-s, dy emrat kryesorë në garë janë spanjolli Pablo Hernández de Cos dhe holandezi Klaas Knot.
Ministrat e Financave të eurozonës pritet t’i diskutojnë kandidaturat në mbledhjen e 9 nëntorit. Megjithatë, vendimi përfundimtar për presidentin e BQE-së do të merret nga Këshilli Europian, ku përfaqësohen krerët e shteteve dhe qeverive.
Largimi i Lagarde hap rrugën për ndryshime më të gjera në drejtimin e bankës me seli në Frankfurt. Gjatë vitit të ardhshëm do të duhet të plotësohen edhe dy vende të tjera në Bordin Ekzekutiv.
Isabel Schnabel pritet të kalojë në Fondin Monetar Ndërkombëtar në janar, ndërsa kryeekonomistit Philip Lane i përfundon mandati në maj.
Sipas një zyrtari të BE-së të cituar nga POLITICO, në takimin e 9 nëntorit ministrat do të shqyrtojnë edhe procesin për plotësimin e të tria posteve.
