CDU-ja ka dalë forca më e madhe politike në zgjedhjet lokale të zhvilluara në landin gjerman të Saksonisë së Poshtme, duke ruajtur epërsinë ndaj SPD-së. AfD-ja u rendit e treta, por shënoi rritjen më të fortë krahasuar me zgjedhjet e mëparshme.
Sipas rezultateve paraprake të publikuara në portalin zgjedhor të landit, CDU-ja siguroi 27.2 për qind të votave në nivel qarqesh, ndërsa SPD-ja mori 24.6 për qind.
AfD-ja arriti në 15.9 për qind, rezultati i saj më i mirë në zgjedhjet lokale në Saksoninë e Poshtme. Të Gjelbrit morën 14.1 për qind, E Majta 6 për qind dhe FDP-ja 3.7 për qind.
Rezultati i CDU-së vjen në një moment të vështirë për kancelarin Friedrich Merz, pas humbjes së partisë në landin Saksoni-Anhalt dhe debateve të shtuara për drejtimin e qeverisë federale.
Megjithëse CDU-ja ruajti vendin e parë, ajo humbi mbështetje krahasuar me zgjedhjet e vitit 2021, kur kishte marrë 31.7 për qind. Edhe SPD-ja pësoi rënie nga 30 në 24.6 për qind.
AfD-ja regjistroi rritjen më të madhe, duke kaluar nga 4.6 në 15.9 për qind. Në rënie ishin edhe Të Gjelbrit, nga 15.9 në 14.1 për qind, dhe FDP-ja, nga 6.5 në 3.7 për qind. E Majta u rrit nga 2.8 në 6 për qind.
Rritet pjesëmarrja në votime
Pjesëmarrja në zgjedhje arriti në 64.6 për qind, nga 57 për qind që ishte pesë vjet më parë. Rreth 6.3 milionë qytetarë kishin të drejtën e votës.
Kryetari i CDU-së në Saksoninë e Poshtme, Sebastian Lechner, deklaroi se partia arriti të shkëputej nga tendenca negative në nivel federal, megjithëse pakënaqësia ndaj Berlinit ishte ndier edhe gjatë fushatës lokale.
“Këto zgjedhje nuk u zhvilluan në rrethana të lehta. Edhe ne e kemi vënë re pakënaqësinë ndaj Berlinit”, tha Lechner.
Kryetari i SPD-së në land dhe njëkohësisht kryeministri i Saksonisë së Poshtme, Olaf Lies, pranoi se rezultati ishte zhgënjyes për partinë e tij.
“Kishim shpresuar të gjithë për më shumë”, deklaroi Lies.
