Ministria e Mbrojtjes parashikon një buxhet prej 76.284 miliardë lekësh për vitin 2027, me një rritje prej 10% krahasuar me vitin 2026. Fondet do të përqendrohen kryesisht në modernizimin e Forcave të Armatosura, forcimin e kapaciteteve mbrojtëse, investimet infrastrukturore dhe përmbushjen e angazhimeve të Shqipërisë në NATO.
Projektbuxheti u prezantua nga ministri i Mbrojtjes, Ermal Nufi, në Komisionin për Çështjet e Brendshme dhe të Mbrojtjes në Kuvend.
Sipas planifikimit financiar, shpenzimet për mbrojtjen do të arrijnë në 2.6% të Prodhimit të Brendshëm Bruto gjatë vitit 2027, duke shënuar një rritje prej rreth 7.5 miliardë lekësh krahasuar me vitin paraardhës.
Ministria parashikon gjithashtu një rritje të mëtejshme të financimit me rreth 1 miliard lekë në secilin prej tre viteve të ardhshme, në funksion të reformave dhe përmbushjes së detyrimeve kushtetuese të Forcave të Armatosura, si dhe angazhimeve ndërkombëtare të vendit.
23.1 miliardë lekë për modernizimin e Forcave të Armatosura
Një nga prioritetet kryesore të projektbuxhetit është modernizimi i kapaciteteve ushtarake, për të cilin janë parashikuar 23.1 miliardë lekë.
Investimet do të përfshijnë pajisjen e Forcave të Armatosura me armatime dhe sisteme të reja, të ndërveprueshme me ato të vendeve aleate të NATO-s.
Në fokus do të jetë blerja e dronëve, avionëve krahëfiks dhe zhvillimi i një sistemi të integruar për vëzhgimin e hapësirës ajrore.
Një tjetër drejtim i rëndësishëm është ndërtimi i kapaciteteve për mbrojtjen kundër dronëve, përmes sistemeve Counter-UAS, si dhe investimet në sistemet e mbrojtjes ajrore.
Projektbuxheti parashikon gjithashtu modernizimin e mjeteve të transportit ushtarak, sistemeve kompjuterike dhe infrastrukturës së komunikimit, me synim rritjen e gatishmërisë operacionale dhe efikasitetit të Forcave të Armatosura.
5.9 miliardë lekë për infrastrukturën ushtarake
Për investimet infrastrukturore janë planifikuar 5.9 miliardë lekë, të cilat do të përdoren për zhvillimin dhe përmirësimin e objekteve strategjike të mbrojtjes.
Ndër projektet kryesore përfshihet ndërtimi i pjesës ushtarake të portit të ri në Porto Romano, një investim që synon forcimin e kapaciteteve logjistike dhe mbështetëse të Forcave të Armatosura.
Gjithashtu, parashikohet rivitalizimi i Bazës së Pashalimanit dhe zhvillimi i infrastrukturës mbështetëse për Korridorin VIII.
Investime të tjera do të realizohen në Spitalin Ushtarak, Akademinë e Forcave të Armatosura dhe strukturat që shërbejnë për përballimin e emergjencave civile.
Forcimi i angazhimeve në NATO dhe gatishmërisë për emergjencat
Projektbuxheti i vitit 2027 synon të mbështesë vijimin dhe zgjerimin e pjesëmarrjes së Forcave të Armatosura shqiptare në operacionet dhe misionet e NATO-s.
Në këtë kuadër, prioritet mbetet forcimi i kapaciteteve për mbrojtjen kombëtare dhe kolektive, si dhe rritja e gatishmërisë për përballimin e krizave dhe emergjencave civile.
Ministria parashikon gjithashtu forcimin e kapaciteteve për të ofruar mbështetje ndaj vendeve të rajonit në rast fatkeqësish natyrore, në kuadër të bashkëpunimit me NATO-n, Organizatën e Kombeve të Bashkuara dhe Bashkimin Evropian.
Një vëmendje e veçantë do t’i kushtohet personelit ushtarak, përmes zhvillimit të politikave të karrierës, përmirësimit të kushteve të punës dhe mjediseve ushtarake, si dhe forcimit të transparencës, integritetit dhe luftës kundër korrupsionit në Forcat e Armatosura.
Mbi 57% e buxhetit për investime kapitale
Sa i përket strukturës së financimit, 42.8% e buxhetit, ose rreth 32.6 miliardë lekë, parashikohet të përdoret për shpenzime korrente.
Ndërkohë, pjesa më e madhe, 57.2% e buxhetit, ekuivalente me rreth 43.6 miliardë lekë, do të orientohet drejt shpenzimeve kapitale.
Kjo strukturë financimi pasqyron përqendrimin e projektbuxhetit te investimet afatgjata, modernizimi teknologjik dhe zhvillimi i infrastrukturës strategjike të mbrojtjes.
Projektbuxheti i vitit 2027 synon të rrisë kapacitetet mbrojtëse të Shqipërisë, të përmirësojë gatishmërinë e Forcave të Armatosura dhe të forcojë kontributin e vendit në sistemin e sigurisë kolektive të NATO-s.
