Kryeministri britanik Andy Burnham ka lënë të hapur mundësinë që Mbretëria e Bashkuar të shqyrtojë në të ardhmen edhe rikthimin në Bashkimin Europian, si pjesë e një rishikimi më të gjerë të marrëdhënieve të vendit me bllokun pas Brexit-it.
Në një intervistë për BBC-në, Burnham tha se marrëveshja aktuale pas Brexit-it ka sjellë “më shumë dëm sesa të mira” dhe se qeveria e tij dëshiron të analizojë se “çfarë është e realizueshme” në raport me BE-në.
Sipas kryeministrit, në tryezë mund të jenë disa variante, nga forcimi i marrëdhënieve ekzistuese, te afrimi me tregun e përbashkët apo bashkimin doganor dhe, në perspektivë, edhe mundësia e rikthimit të plotë në BE. Burnham theksoi se çdo opsion duhet të vlerësohet mbi avantazhet, kostot dhe realizueshmërinë e tij.
Deklaratat vijnë menjëherë pas fjalimit të tij të parë në konferencën vjetore të Partisë Laburiste si kryeministër, ku ai kërkoi një marrëdhënie afatgjatë dhe më të afërt me Bashkimin Europian.
Qëndrimi i ri mund të rihapë një nga debatet më të ndjeshme të politikës britanike, pasi Burnham kishte deklaruar më herët se nuk synonte të rikthente vendin në përplasjet politike të viteve të Brexit-it.
Ai gjithashtu shkon përtej disa prej angazhimeve të manifestit laburist të vitit 2024, i cili synonte ta bënte Brexit-in të funksiononte më mirë, por përjashtonte rikthimin në tregun e përbashkët, bashkimin doganor apo vetë BE-në.
Paraardhësi i Burnham, Keir Starmer, kishte ndjekur një politikë më të kufizuar afrimi me Brukselin, duke kërkuar bashkëpunim në standardet ushqimore, lëvizjen e të rinjve dhe sistemin europian të tregtimit të karbonit.
