Qeveria britanike pritet të miratojë të mërkurën projektin e gazit Jackdaw, në brigjet e Skocisë, pasi një vendim i mëparshëm për zhvillimin e tij u rrëzua nga gjykata.
Sipas POLITICO-s, që citon një zyrtar të lartë qeveritar dhe dy persona të informuar mbi planet, njoftimi pritet të bëhet të mërkurën, mundësisht në orët e para të mëngjesit.
Ministrja e Energjisë, Miatta Fahnbulleh, pritet të miratojë deklaratën mjedisore të projektit. Paralelisht, Autoriteti i Tranzicionit të Detit të Veriut pritet t’i japë miratimin planit të zhvillimit të vendburimit.
Jackdaw, pranë brigjeve të Aberdeenit, mori miratimin fillestar në qershor 2022. Megjithatë, vendimi u rrëzua në janar 2025, pas një padie nga organizatat mjedisore.
Projekti zhvillohet nga Adura, një sipërmarrje e përbashkët e Shell, Equinor dhe Ithaca Energy.
Sipas vlerësimeve të kompanisë, Jackdaw mund të sigurojë rreth 6 për qind të prodhimit britanik të gazit në Detin e Veriut, sasi e barasvlershme me nevojat për ngrohje të rreth 1,4 milionë banesave.
Qeveria britanike nuk pranoi të komentonte kur u kontaktua nga POLITICO.
