I dërguari i posaçëm amerikan, Steve Witkoff, do t’i propozojë presidentit rus Vladimir Putin bisedime të drejtpërdrejta me Donald Trump dhe Volodymyr Zelenskyn, në përpjekje për të arritur një armëpushim në Ukrainë.
Nisma u bë publike të martën, pas takimit mes Witkoff dhe presidentit ukrainas në Oslo, të organizuar nga kryeministri norvegjez Jonas Gahr Støre.
Støre njoftoi se Witkoff do të udhëtojë të mërkurën në Shën Petersburg për t’u takuar me udhëheqjen ruse dhe për të paraqitur propozimet e hartuara nga përfaqësues europianë dhe amerikanë.
“Kemi zhvilluar sot bisedime të mira dhe konstruktive, të nevojshme pas ngjarjeve të javës së kaluar”, deklaroi kryeministri norvegjez. Sipas tij, takimet në Rusi mund të hapin rrugën për negociata në nivel udhëheqësish.
Nëse realizohet, samiti do të ishte takimi i parë trepalësh mes presidentëve të SHBA-së, Rusisë dhe Ukrainës që nga nisja e pushtimit rus në shkallë të gjerë në vitin 2022.
Përpjekjet e mëparshme për një takim mes Putinit dhe Zelenskyt kanë dështuar. Kremlini ka këmbëngulur së fundmi se një takim i tillë mund të zhvillohet vetëm në Moskë.
Zelensky e vlerësoi pozitivisht takimin në Oslo, por theksoi se çështjet që lidhen me të ardhmen e territoreve ukrainase mund të diskutohen vetëm në nivel udhëheqësish.
Ai nënvizoi gjithashtu se çdo marrëveshje paqeje duhet të përfshijë garanci reale sigurie dhe të hartohet me pjesëmarrjen e Ukrainës.
Takimi në Norvegji erdhi pas disa ditësh tensionesh mes Kievit dhe presidentit amerikan, sipas POLITICO-s.
