Mbretëria e Bashkuar do të akordojë deri në 5 milionë paund për të mbështetur vendet e Ballkanit Perëndimor, përfshirë Shqipërinë, në luftën kundër emigracionit të paligjshëm dhe krimit të organizuar.
Paketa u njoftua nga ministri britanik i Shtetit për Evropën, Lord Wood of Anfield, gjatë Samitit të Procesit të Berlinit në Mal të Zi.
Financimi do të përdoret për trajnime, ekspertizë britanike dhe forcimin e shkëmbimit të informacionit mes institucioneve të rajonit. Synimi është goditja e rrjeteve kriminale dhe parandalimi i shfrytëzimit të emigrantëve.
Nga Budva, ministri britanik tha se bandat kanë shfrytëzuar prej kohësh rrugët e rajonit, duke përfituar nga personat e pambrojtur dhe duke rrezikuar jetët e tyre. Sipas tij, mbështetja e re do të forcojë bashkëpunimin ndërkombëtar dhe sigurinë evropiane.
Sipas njoftimit për mediat, pajisjet dhe trajnimet e financuara nga Londra kanë ndihmuar autoritetet e Ballkanit Perëndimor të kryejnë më shumë se 100 ndërhyrje të lidhura me emigracionin që prej qershorit 2026, si dhe të godasin disa banda kriminale.
Ndihma do të mbështesë edhe Task-Forcën e Përbashkët të Emigracionit (JMTF), e cila bashkon specialistë nga vende të ndryshme për të identifikuar dhe ndërprerë veprimtaritë e paligjshme. Deri tani, ajo ka zhvilluar operacione në Shqipëri, Kosovë, Mal të Zi dhe Maqedoninë e Veriut.
Qeveria britanike tha se do të vijojë bashkëpunimin me partnerët për të goditur rrjetet e trafikimit dhe organizatorët e emigracionit të paligjshëm përpara se të rrezikojnë jetë të tjera.
