Ambasadorja e Bashkimit Evropian në Shqipëri, Sofia Moreira de Sousa, zhvilloi një takim me ministrin e Drejtësisë, Toni Gogu, ku në qendër të diskutimeve ishin reforma në drejtësi dhe prioritetet e vendit në procesin e integrimit evropian.
Gjatë takimit, diplomatja evropiane theksoi rëndësinë e zbatimit të qëndrueshëm të reformës dhe të forcimit të besimit të qytetarëve te institucionet e drejtësisë.
“Besimi i publikut te sistemi i drejtësisë është thelbësor për të ardhmen e Shqipërisë në BE”, deklaroi Moreira de Sousa.
Sipas ambasadores, bisedimet me ministrin Gogu u përqendruan edhe te hapat që duhet të ndërmarrë Shqipëria për përmbushjen e prioriteteve që lidhen me anëtarësimin në Bashkimin Evropian.
Ajo shprehu gatishmërinë e delegacionit të BE-së për të vijuar bashkëpunimin me Ministrinë e Drejtësisë dhe institucionet shqiptare.
“Presim të punojmë së bashku për të mbështetur progresin e mëtejshëm”, u shpreh ambasadorja.
Reforma në drejtësi dhe forcimi i shtetit të së drejtës mbeten ndër çështjet kryesore të procesit të negociatave të Shqipërisë me Bashkimin Evropian.
